Almaty áýejaıynda júk tasýǵa arnalǵan arbalar urlanýda

ASTANA. QazAqparat - Almatyda Qoǵamdyq keńestiń otyrysynda Búkilálemdik 28-shi qysqy Ýnıversıada-2017 sharasyn uıymdastyrý aıasynda Almaty áýejaıynyń qyzmetin jetildirý máselesi talqylandy. Bul týraly QazAqparat tilshisine qala ákimdiginiń baspasóz qyzmetinen habarlandy.

Májilis barysynda Almaty áýejaıynyń prezıdenti Aıbol Bekmuhambetov kásiporyndy damytý jospary jóninde baıandama jasady. Jıyn barysynda qalyń kópshiliktiń nazaryn júk tasýǵa arnalǵan arbalardyń joǵalyp ketý jaǵdaılary alańdatty. 

«300 arba alǵan edik, 100-i ǵana qaldy. Endi taǵy 600-ne tapsyrys berdik»,-dedi kásiporyn basshysy.

Al, Qoǵamdyq keńes múshesi Marat Shıbutovtyń áýejaıda ornalastyrylǵan 852 beınekameranyń «qaıda qarap turǵany» týraly zańdy saýalyna Bekmuhambetov nanymdy jaýap bere almady.

Májilis barysynda Shıbutov júk tasymaldanatyn aımaqtyń jumysyn retteý qajettigin aıtty. Naqtyraq aıtqanda, júk tasýshylardyń sanyn arttyrý, júkti ótkizý jyldamdyǵyn jetildirý, júk salatyn arbalardyń sanyn kóbeıtýmen qatar dárethanalardy tártipke keltirip, ana men balaǵa arnalǵan oryndardaǵy talaptardyń durys bolýyna jiti qadaǵalaý qajettigin aıtty.