Almaty áýejaıy aýmaǵynda tóbeles shyǵarǵandar qamaýǵa alyndy
«26 shildege qaraǵan túni áýe aılaǵynyń avtoturaǵynda úsh mas er adam tóbelesken bolatyn. Bul týraly polıtsııaǵa kóshede ótip bara jatqandar habarlady. Tóbelesip jatqandar polıtsııa qyzmetkerleriniń talaptaryna agressııamen jaýap berdi. Olardyń biri – buryn sottalǵan 28 jastaǵy Ý. esimdi azamat syranyń shyny bótelkesin syndyryp, polıtseıge qaraı júgirdi, ony soqqyǵa jyqqysy keldi. Aýyr qylmysty toqtatqan tártip saqshysy qyzmettik qarýynan aspanǵa eskertý oǵyn atqan bolatyn», - dedi Almaty qalalyq Polıtsııa departamenti bastyǵynyń orynbasary Rústem Ábdirahmanov.
Polıtsııa ókiliniń aıtýynsha, tóbeleske qatysýshylar ustaldy. Olar – Almaty jáne Túrkistan oblystarynyń turǵyndary. Ekeýi – buryn adam tonaǵany jáne bótenniń múlkin urlaǵany úshin sotty bolǵan.
«Quqyq buzýshylar áreketi QR QK-niń 293-baby 2-bóligi «buzaqylyqpen» saralandy. Sotqa deıingi tergeý organy sottan kúdiktilerge qatysty qamaýǵa alý bultartpaý sharasyn tańdaýdy surady. Ony Túrksib aýdanynyń prokýrory da qoldady. Tergeý soty qylmystyń úsh qatysýshysyn qamaýǵa alýǵa sanktsııa berdi», - deıdi Rústem Ábdirahmanov.
Buǵan deıin Almaty áýejaıynda tóbeles bolyp, tártip saqshysy qyzmettik qarýdan oq atqany týraly jazǵan edik.
