Almaty, Astana jáne Kókshetaýda tegin qazaq tili klýbtary ashyldy
Almatyda eki yntaly kúndelikti tildesýge sebi tıetin «Alma club» qazaq tili klýbyn ashty.
Aman Mámbetalıev tarıhı otanyna 2008 jyly Reseıden kóship keldi. Amannyń otbasyndaǵylar qazaq tilinde sóılegenmen, orys tilinde bilim alady, sondyqtan ana tilin saqtap qalý qıyn bolǵanyn aıtady. Byltyr ol tanystarymen birge negizgi jumysynan qol úzbeı qoǵamdyq qyzmetpen aınalysýǵa kelisedi.
Saıasattanýshy Islam Kýraevpen Facebook-te tanysyp, ózine jáne dostary úshin qazaq tilin úıretetin kýrs ashýdy oılastyrady. Alǵashqy sabaq Almatyda, shildeniń sońynda boldy. alǵashqy sabaqtyń ózine 10-ǵa jýyq adam keldi.
«Qoǵamǵa paıdasy tıetin birdeńe jasaǵymyz keldi. Bizge eshkim jalaqy tólemeıdi, bizdiń maqsatymyz - memlekettik tildi tartymdy ári qyzyqty etý. Halyqtardy jaqyndastyratyn da - til. Buǵan qyzyǵyp otyrǵan adamdar birshama», deıdi Islam Kýraev.
Kýrstardyń baǵdarlamasy Qanat Tasybekovtiń «Sıtatsııalyq qazaq tili» kitabyna negizdelgen.
«Oqytýshyny uzaq izdedik. Biraq tájirıbeli oqytýshylar jalaqy surady. Sondyqtan jas yntalylarǵa bet burdyq. Sóıtip polıglot Eskendirmen tanystyq. Ol qazaq, orys, aǵylshyn tilderin jete meńgergen, onyń ústine tarıh pen lıngvıstıkany jaqsy biledi», - deıdi bastamashyldar.
Olardyń aıtýynsha, kóptegen kýrstardyń ádistemesi eskirgen.
«Nashar biletin adamǵa mol teorııalyq aqparat berip, qyzyǵýshylyǵyn ketiredi. Al men sózdik qorǵa kóbirek mán berip, árbir sózdiń maǵynasyn, tarıhyn túsindiremin. Maqaldarǵa kóbirek júginemiz. Oqýshy osy arqyly halyqtyń tanymyn túsine bastaıdy», - deıdi Eskendir Saǵymbekov.
Kýrstardyń formaty English club ádistemesine uqsas. Adamdar kelip, pedagogtan belgili bir aqparatty alady da, ony praktıkalyq sabaqta pysyqtaıdy.
«Qazaq tilin múlde bilmeı kelgen adamdar da qazir sóılem qurap, áńgimeniń ne jaıly ekenin túsine bastady. Munda adamdar kedergilerdi joıyp, batyl sóıleı bastaıdy. Meniń de oqyp jatqanyma kóp boldy, biraq únemi ýaqyt taba berý qıyn. Pedagog naǵyz ıntellektýal, erýdıt. Qazaq tilinen tys Eskendir Qazaqstannyń tarıhyn da aıtyp otyrady», - deıdi oqýshy Igilik Qańtarbaı.
Qazirgi kezde ıdeıa respýblıkalyq deńgeıge kóterildi. Tegin klýbtar Almatydan bólek Astana, Kókshetaý qalalarynda da ashyldy. Uıymdastyrýshylar atalǵan qalalardan pikirlesterin taýyp, endigide soltústik óńirlerde de qazaq tilin damytýǵa ázir janashyrlardy izdep jatyr. Almatydaǵy sabaqtar Dostyq úıiniń bazasynda ótedi, al Astanada túrli uıymdar, atap aıtqanda Kásipkerler palatasy, kitaphanalar, meıramhanalar da sabaq ótýge jaǵdaı jasap otyr. Kókshetaýda kýrs endi ǵana ashyldy, ol qalalyq kitaphanada ótip jatyr.
Kóktem shyǵa, uıymdastyrýshylar kóshede ashyq sabaqtar ótip, qazaq tilinde sóıleýdi qajet etetin ekskýrsııalar uıymdastyrmaq.
