Almaty - arheologııalyq eskertkishterge baı qala - arheolog

ALMATY. QazAqparat - 15 tamyz - Arheologtar kúni. Kásibı merekeniń jazda atap ótilýi beker emes. Sebebi, arheologtar úshin bul - dala maýsymy jumysynyń naǵyz qyzǵan shaǵy. Bul týraly óńirlik kommýnıkatsııalar qyzmetiniń brıfınginde Á.Marǵulan atyndaǵy arheologııa ınstıtýty dırektorynyń ǵylym jónindegi orynbasary Talǵat Mamyrov aıtty, dep habarlaıdy QazAqparat tilshisi.

Ǵalymnyń aıtýynsha, qazirgi ýaqytta arheologtardyń kópshiligi jazyqta, ekspedıtsııalarda, arheologııalyq oryndardy qazyp, zerttep, kóne zamannyń jańa nysandaryn izdeýde.

«Búginde elimizde 15 arheologııalyq jasaq jumys isteıdi. Ekspedıtsııalar barlyq baǵyttar boıynsha júrgiziledi. Bul - tas, qola ǵasyry, erte temir ǵasyry jáne orta ǵasyr dáýiri. Mysaly, osy maýsymda Aqtóbe oblysynyń aýmaǵynda qoladan quıylǵan metallýrgııalyq peshter anyqtaldy. Eger buryn mundaı metallýrgııalyq oljalar negizinen Ortalyq Qazaqstan aýmaǵynda bolsa, búginde arheologııalyq otrıadtar jumysynyń nátıjesinde taý-ken isiniń basqa óńirlerde de damyǵany belgili boldy», - dedi spıker.

Budan basqa, Shyǵys Qazaqstan oblysynda zertteýler iske asyrylýda, sondaı-aq, Aqtóbe oblysynyń Temir aýdanyndaǵy Tasqopa qorymynan sarmat jaýyngerin qaıta rekonstrýktsııalaý júrgizilýde.

Ǵalymyń aıtýynsha, Almaty - arheologııalyq eskertkishterge óte baı qala. Mysaly, qazba barysynda tabylǵan kóne tıyndar sonyń aıǵaǵy.

«Bizdiń qalamyzda orta ǵasyr eskertkishteri óte kóp. Temir ǵasyrynyń qorǵandary, eldi mekenderi jıi kezdesedi. Alma-Arasan aýdanyndaǵy shekara mańy aımaǵynda buryndary tabylǵan qalashyqtar bar. Almatynyń joǵarǵy bóliginde arheologııalyq oljalar bolýy ábden múmkin», - dedi Talǵat Mamyrov.

Ol sondaı-aq ınstıtýt qyzmetkerleriniń aldynda tabylǵan zattardy tolyq túgendeý, olardy sıpattaý jáne ǵylymı aınalymǵa engizý mindeti turǵanyn atap ótti.

Sóz sońynda Talǵat Mamyrov qalaı arheolog bolýǵa bolatynyn aıtyp berdi.

«Arheolog bolý úshin zertteýshiniń arheologııa boıynsha bazalyq bilimi bolýy kerek. Bul tarıhshy bolýy múmkin. Sondaı-aq arheologtardy «kúrekpen qarýlanǵan tarıhshylar» dep beker atamaǵan.

Qazaqstanda arheologtardy bes joǵary oqý orny daıyndaıdy. Olar Ál-Farabı atyndaǵy Qazaq ulttyq ýnıversıteti, Gýmılev atyndaǵy Eýrazııa ulttyq ýnıversıteti, Beketov atyndaǵy Qaraǵandy memlekettik ýnıversıteti, ıAssaýı atyndaǵy Qazaq-túrik ýnıversıteti jáne Qorqyt ata atyndaǵy Qyzylorda memlekettik ýnıversıteti sııaqty joǵary oqý oryndary», - dedi spıker.