Almaty ákimi Japonııa - Qazaqstan dostyǵy japondyq parlament lıgasynyń tóraǵasymen kezdesti
Taraptar mádenı- gýmanıtarlyq, partııaaralyq baılanystardy nyǵaıtý máselelerin talqylady.
Almaty ákimi Memleket basshysynyń syndarly saıasaty arqasynda Japonııanyń Qazaqstan úshin strategııalyq serikteske aınalǵanyn atap ótti.
Ústimizdegi jyldyń tek 5 aıy ishinde megapolıs pen Japonııa arasyndaǵy taýar aınalymy 60%-ǵa artty. Almatyda 14 birikken jáne 21 japondyq kásiporyn tirkelgen. Qalada japon iskerlik klýby men japon ındýstrıaldy park qurylyp, «Tokyo Rope Almaty» jobasynyń ekinshi kezegi júzege asýda.
Tokıo men Almaty arasynda tyǵyz baılanys ornyqqan. Óıtkeni eki qalada da barlyq turǵyndar úshin qaýipsizdik pen jaılylyqty qamtamasyz etetin 2020 jylǵa deıingi damý baǵdarlamasy júzege asýda.
Óz kezeginde Takeo Kavamýra ekijaqty ekonomıkalyq baılanys tehnologııa, bilim, qarjy transfertterin ǵana emes, sonymen qatar eki el mádenıetin de jaqyndastyra túsetinin atap ótti.
«Óziniń bastamalarymen Qazaqstan Prezıdenti halyqaralyq arenada úlken abyroı men bedelge ıe, onyń kemeńger basshylyǵy arqasynda Qazaqstan jedel qarqynmen damýda. Men 1993 jyly Almatyda bolǵanmyn. Sodan beri qaraı qala tanymastaı ózgerip ketipti, burynǵydan da sulý jáne ásem megapolıske aınalypty. Almaty myńjyldyq mereıjasyn atap ótipti, qala burynǵydan da tanymal bolyp, sheteldik týrısterdiń, sonyń ishinde japondyqtardyń qyzyǵýshylyǵyn arttyrýda, - dedi Japonııa Parlamenti ókilderi palatasynyń depýtaty.
Kezdesý barysynda Takeo Kavamýra Astanadaǵy «EKSPO - 2017» kórmesiniń oıdaǵydaı ótip jatqanyn, Japonııa da 2025 jyly Osaka qalasynda osynaý mańyzdy halyqaralyq kórmeni ótkizýge úmitker ekenin jetkizdi.
QR Prezıdenti N. Á. Nazarbaevtyń 1994 jyly kúnshyǵys eline alǵashqy sapary barysynda qurylǵan Japonııa- Qazaqstan dostyǵynyń japondyq parlament lıgasy túrli partııalardyń basyn biriktiretin Japonııa Parlamenti depýtattarynyń Qazaqstanǵa degen dostyq ıgi nıetin ushtaı túsedi. Lıga músheleri ekijaqty yntymaqtastyqty odan ári nyǵaıtý úshin jıi jınalyp turady.
