Almaty ákimi Qasym-Jomart Toqaevtyń bastamalaryn qoldady

ALMATY. QazAqparat - Búgin Almatyda Naýryz meıramy keń aýqymda atalyp ótti. Ulystyń uly kúni qalanyń barlyq segiz aýdanynda toılanyp, halyqtyń basym kópshiligi «Astana» alańyna, Jibek joly men Panfılov kóshelerinde, Almaty Arena, Halyk Arena men «Suńqar» shańǵy keshenine, «Atakent» aldynda jınaldy, dep habarlaıdy QazAqparat tilshisi.

Óziniń quttyqtaý sózinde Almaty qalasynyń ákimi Baýyrjan Baıbek Tuńǵysh Prezıdent Nursultan Nazarbaevtyń qazirgi qazaqstandyq memlekettiliktiń negizin qalaýshy retinde tarıhı mıssııasy týraly sóz qozǵap, álemdik arenada qoldaýǵa ıe bolǵan halyqaralyq bastamalary kóptiń qoldaýyna ıe bolǵanyn erekshe atap ótti.

«Memleket basshysy Qasym-Jomart Kemeluly Toqaev Elbasy qalyptastyrǵan eldiń damý strategııasy, ishki jáne syrtqy saıasatynyń basymdyqtary aldaǵy ýaqytta da kezeń-kezeńimen iske asyryla beretinin naqty atap ótti. Ol Elbasyn «Altyn juldyz» aıryqsha belgisimen marapattap, «Halyq Qaharmany» ataǵyn berdi. Ol elordaǵa Qazaqstannyń Tuńǵysh Prezıdentiniń esimin berýdi, Tuńǵysh Prezıdenttiń qurmetine monýment ornatýdy jáne Qazaqstannyń árbir qalasyndaǵy ortalyq kóshelerge Nursultan Nazarbaevtyń esimin berýdi usyndy. Almaty turǵyndary Elbasyǵa úlken qurmetpen jáne shynaıy súıispenshilikpen qaraıdy. Eki jyl buryn Táýelsizdik kúni qarsańynda qalalyq máslıhat Almaty turǵyndarynyń keń aýqymdaǵy qoldaýyna súıenip, bizdiń Tuńǵysh Prezıdentimizdiń esimimen Almaty qalasynyń ortalyq kósheleriniń birin ataý týraly sheshim qabyldady. Fýrmanov kóshesi «Nursultan Nazarbaev dańǵyly» dep ózgertildi. Ótken jyly bul dańǵyl tolyǵymen jańartylyp, qalanyń turǵyndary men qonaqtaryna yńǵaıly ári tartymdy dańǵyl bola tústi. Sonymen birge, biz Jibek Joly, Panfılov, Abaı jáne Abylaı han dańǵyldarynyń kóshelerin qalpyna keltirdik, ıaǵnı qalanyń tarıhı ortalyǵynyń 60 paıyzy jańartyldy. Qalanyń joǵarǵy bóliginde - Alataýdyń kórkem jerinde ornalasqan QR Tuńǵysh Prezıdentiniń saıabaǵy qala turǵyndary men qonaqtaryna burynnan bergi súıikti demalys ornyna aınaldy. 2011 jyly almatylyqtardyń bastamasy boıynsha Nursultan Nazarbaevqa eskertkish alǵys belgisi retinde ornatyldy», - dedi Baýyrjan Baıbek.

Aıta keterligi, búgin Almatydaǵy Naýryz meıramyn toılaýǵa 300 myńnan astam adam jınalǵan bolatyn. Olardyń ishinde Japonııa, Ońtústik Koreıa, Malaızııa, Belarýstan kelgen júzdegen týrıst te bar. Bir aı boıy qalada 150-den astam iri merekelik is-shara ótedi. Onyń ishinde festıvalder, ulttyq oıyndar jarystary, kórmeler jármeńkesi, sheberlik synyptary men taǵy basqa sharalar da bar.

«ıÝNESKO-nyń Búkilálemdik mádenı murasyna kiretin Naýryz merekesiniń ulttyq jáne halyqaralyq mańyzy bar. Kúni búginge deıin bizdiń kúsh-jigerimiz negizinen Naýryzdyń dástúrlerin qalpyna keltirýge, onyń tereń rýhanı maǵynasyn nyǵaıtýǵa jáne bizdiń halqymyzdyń sanasynda biriktiretin rólin nyǵaıtýǵa baǵyttalǵan edi. Endi biz, Áz Naýryzdy, shyn máninde halyqaralyq sharaǵa aınaldyrýǵa baǵyttaýymyz kerek. Bul tek qazaqstandyqtar ǵana emes, sondaı-aq kóptegen sheteldik týrısterdi asyǵa kútetin meıramǵa aınalady. Jyl saıyn bizdiń qalada 50-den astam halyqaralyq is-shara ótkiziledi. Bul kóshpendilerdiń ulttyq oıyndary, dástúrli mýzykadan halyqaralyq jarystar, etnıkalyq festıvaldar, ulttyq at sporty oıyndary... Naýryz olardyń arasynda basty orynǵa ıe. Bıylǵy jyly Naýryzǵa 5 myńnan astam týrıst keldi. Biz olardy jyly qarsy alamyz. Qazaqstan nıeti túzý ár qonaqqa árdaıym qýanady », - dedi Almaty ákimi.