Almatynyń taý bókterinde zańsyz salynǵan 28 nysan buzyldy
ALMATY. KAZINFORM — Megapolıste qurylysqa, ásirese taýly aımaqtaǵy qurylysqa baqylaýdy kúsheıtý jumystary jalǵasyp jatyr.
Qala qurylysyn baqylaý basqarmasynyń málimetinshe, jyl basynan beri qurylys nysandaryna 377 jospardan tys tekserý júrgizildi. Onyń 211-ne zańbuzýshylyqtardy joıýǵa uıǵarym berildi. Al 2023 jyly 1074 tekserý júrgizilip, 634 nusqama berilgen.
«Byltyr sotqa qurylys normalaryn buzǵany úshin 206 talap aryz jiberilip, onyń 100-i boıynsha talqylaýlar búgingi kúnge deıin jalǵasyp jatyr», - dep habarlady vedomstvodan.
Buǵan deıin qala ákimi taýly jerde zańsyz qurylysty baqylaýdy kúsheıtýdi tapsyrǵan edi. Sotqa zańsyz nysan boıynsha 45 talap-aryz berildi. Sonyń 36-sy boıynsha búgingi kúnge basqarmanyń talap-aryzy qanaǵattandyryldy.
«Ótken jyldan beri 28 zańsyz nysan, onyń ishinde bıznes-ortalyqtar, meıramhanalar, japsarma qurylys pen avtoservıster, sondaı-aq «Mechta» men «KHAN» sııaqty iri turǵyn úı keshenderi buzyldy», - dep atap ótti basqarmadan.
Budan ózge qala basshysynyń bastamasymen zańnamaǵa ınspektsııalaý sheńberinde qurylys jumysyn toqtata turý múmkindigimen qurylys kezinde buzýshylyqtardy anyqtaýǵa jáne jolyn kesýge múmkindik beretin «jedel den qoıý sharasy» jańa baqylaý tetigin engizý boıynsha túzetýler engiziledi.
Esterińizge sala keteıik, 2022 jyldyń maýsym aıynda qala máslıhaty ákimdiktiń bastamasymen aýmaqtyń fýnktsıonaldyq aımaqtaryn salýdyń qala qurylysy reglamentterin iske asyrý josparyna ózgerister engizdi. Ol ózgeris betkeıleri 15 gradýstan asatyn ýchaskelerde qurylysqa tyıym salýdy kózdeıdi.
Qabyldanǵan ózgerister Almaty qalasynyń 2040 jylǵa deıingi Bas josparynda jáne egjeı-tegjeıli josparlaýdyń jańa jobalarynda kórinis tapty.
Qoǵamdyq talqylaý qorytyndysy boıynsha oǵan qala turǵyndarynyń, sarapshylardyń birqatar usynysy engizildi. Olardyń biri — taý bókterindegi 4270 gektardan astam jerdi rekreatsııalyq aımaqqa aýystyrý.
Almaty Qalalyq josparlaý jáne ýrbanıstıka basqarmasynyń málimeti boıynsha, taý bókterindegi jerde obektilerdi jobalaýǵa azamattardyń ótinishi negizinde sol aımaqtaǵy topyraqtyń ınjenerlik-geologııalyq deregi beriledi. 2022 jyly 36 nysannyń qurylysyna ruqsat berilmese, ótken jyly – 89, al bıyl – 32.
«Sonymen qatar Memleket basshysynyń tapsyrmasy boıynsha ázirlenetin qurylys kodeksine qala qurylysyn baqylaý organdarynyń ókilettikterin kúsheıtý jóninde usynystar engiziledi. Bul jerde jeke turǵyn úılerdiń qurylysyn tekserýge ruqsat berý týraly aıtylyp otyr. Óıtkeni keıbir qurylys salýshylar taý bókterinde jeke turǵyn úı qurylysynyń ornyna kóp qabatty úı turǵyzady», - dep habarlady ákimdikten.
Jalpy Almatyda qurylys salasynda tártip ornatý boıynsha keshendi jumys jalǵasady.
