Almatynyń taý bókterinde zańsyz qurylys nysany súrilip jatyr
ALMATY. KAZINFORM — Bostandyq aýdanynda zańsyz salynǵan taǵy bir nysan buzylady.
Qala qurylysyn baqylaý basqarmasynyń málimetinshe, úı qurylysy bastalǵanǵa deıin menshik ıesine taý etegin kesip, tirek qabyrǵasyn zańsyz salǵany úshin nusqama berilgen. Odan keıin menshik ıesi baý-baqsha úılerin salýǵa kirisip, eki blokty turǵyn úı salǵan. Qurylys aıaqtalǵan soń, menshik ıesi nysandy baý-baqsha úıi retinde óz betimen paıdalanýǵa bergen, biraq bul kelisilgen eskızdik jobaǵa sáıkes kelmegen.
Basqarma 2024 jyly 16 mamyrda Almaty qalasy Bostandyq aýdandyq sotyna bastapqy qujattardy joıý jáne nysandardy buzý týraly talap aryz bergen.
— Sot isteri aıaqtalǵannan keıin 2025 jyly 20 mamyrda menshik ıesiniń apellıatsııalyq shaǵymy qanaǵattandyrylmaı, buzý týraly sheshim zańdy kúshine endi. Nysandy buzý búgin Almaty qalasy Ádilet departamentiniń sot oryndaýshylarynyń qatysýymen bastaldy, — dep habarlady basqarmadan.
Eske salaıyq, buǵan deıin Almatynyń taý bókterinde eki zańsyz nysan súrilip jatqanyn jazǵanbyz.