Almatynyń shetinde úlken ıppodrom salynady – Maqsat Ahaev
ALMATY. KAZINFORM – «Respýblıkalyq zaýyt jylqylary tuqymy palatasy» Prezıdenti Talǵat Jaısanbaev pen Qazaq Jockey Club tóraǵasy Maqsat Ahaev Qazaqstanda klassıkalyq at jarystyń damýy taqyrybynda ótken baspasóz máslıhatynda elimizde at sportynyń damýy men onyń máseleleri jaıynda óz oılarymen bólisti.
2010 jyldan beri qaraı Qazaqstanda at sporty ındýstrııasy úlken quldyraý kezeńin basynan ótkerdi. Osyǵan baılanysty elimizdiń myqty degen shabandozdary shetelge jumys izdep ketken bolatyn. Bul týraly «Respýblıkalyq zaýyt jylqylary tuqymy palatasy» Prezıdenti Talǵat Jaısanbaev aıtty.
«Álemdik at jarystaryna qatysý úshin, bizdiń shabandozdar Baýyrjan Myrzabaev sekildi perspektıvasy úlken jokeı bolýy úshin bizdiń elde klassıkalyq at jarysyn damytý kerek. Osyǵan oraı, 2018 jyly beıresmı túrde at jarysy qoǵamyn ashqanbyz, 2023 jyly ol resmı túrde «Qazaq Jockey Club» qoǵamdyq birlestigi bolyp ózgertildi. Onyń quramyna elimizdegi jetekshi jylqy ósirýshiler kirdi. Klýbtyń tóraǵasy bolyp belgili jylqy ósirýshi azamat Maqsat Ahaev taǵaıyndaldy. Bıylǵy klýbtyń josparyna sáıkes 1 mamyr men 15 qazan aralyǵynda at jarysy maýsymy ótedi», - dedi Talǵat Jaısanbaev.
Ol Halyqaralyq at sporty organdarynyń federatsııasynyń (IFHA) quramyna kirý basty maqsat ekenin aıtty.
«Bizge ol ne beredi? Bizdiń jeńimpaz attar halyqaralyq reıtıngke ıe bolatyn bolady, mysaly, Kabırhannyń reıtıngi qazir 115 upaıǵa jetti, sol sekildi eger attarymyzda 100 upaıdan joǵary halyqaralyq reıtıngi bolsa olardyń quny 100 myń dollardan joǵary bolady. Bul jylqy ósirýshilerge úlken perspektıva beredi. ıAǵnı, elimizde jylqy ósirýmen aınalysý tıimdi bolady. Ekinshiden, bizdiń jokeıler sheteldik ıppodromdarda óner kórsete alady. Olardyń deńgeıi men jalaqysy álemdik jokeılermen teń bolady», - dedi spıker.
Qazaq Jockey Club tóraǵasy Maqsat Ahaevtyń oıynsha Qazaqstanda at sportyn damytý úshin ıppodromdardy kóbirek salý kerek.
«Qazaqstanda qazir eki-aq ıppodrom bar. Biri osy Almatyda, ekinshisi Astanada, qazir ol rekonstrýktsııada, «Kóshpendiler» oınyna daıyndalyp jatyr. Ippodrom degen jalpy ne nárse? Ol aldymen atty synaqtan ótkizetin jer. Ol jerde neǵurlym báıgege qosatyn júırik attar turý kerek. Ol ulttyq báıge ma, klassıkalyq báıge ma, báribir. Shyny kerek, buǵan deıin Almaty ıppodromynda olaı bolǵan joq. Bireýdiń úsh aty myna at qorada, ekeýi ana at qorada, tórteýi myna jerde degendeı, keleńsiz jaǵdaılar bolǵan. Qazir onyń bári joıyldy. Qazir ıppodromda tek shabatyn attar tur. Aıta keteıin, aldaǵy ýaqytta Almatyda qalanyń shetinde úlken, jaqsy ıppodrom salynady, qazir onyń jobasy jasalyp jatyr. Ol qaladan 12 shaqyrym jerde bolady», - dedi Maqsat Ahaev.
Onyń aıtýynsha, búgingi kúni álemde qazaqtyń alaman báıgesin eshkim tanymaıdy.
«Biz álemdik klassıkalyq báıgeni úırenip, ony ary qaraı damytýymyz kerek. Sonda ǵana bizdiń attar shetelde kórinedi. Al bizdiń alaman báıgeni álemdik deńgeıde ótkizý úshin týra osy klassıkalyq báıgeniń erejeleri sekildi erejelerdi shyǵaryp, ony damytýymyz kerek. Onymen qazir Ulttyq at sportynyń federatsııasy aınalysyp jatyr. Bolashaqta ol armanǵa da jetermiz degen oıdamyn. Sondaı-aq bizde aldaǵy ýaqytta Baýyrjan Myrzabaev atyndaǵy jokeıler mektebin ashsaq degen jospar bar. Ol mektepte kezinde báıgege shapqan balalardy ary qaraı jokeı bolýǵa úıretemiz. Sondyqtan jokeıler mektebin ashý, bapkerlerdi oqytý bizdiń negizgi sharýamyzdyń biri», - dedi ol.
«Respýblıkalyq zaýyt jylqylary tuqymy palatasy» Prezıdenti Talǵat Jaısanbaevtyń aıtýynsha, Olimpbet býkmekerlik keńsesi elde ótetin túrli báıgelerge demeýshilik jasap júrgenin aıtty.
«Ol bıyl da, byltyr da bizdiń resmı demeýshimiz. Bizde ótetin at báıgeleriniń júlde qorlaryn toltyrý úshin qarjy kerek. Bul rette Olimpbet býkmekerlik keńsesi bizge demeýshilik jasap júr. Sondaı-aq elimizde Respýblıkalyq veterınarııalyq zerthana bar. Ókinishke qaraı, ol at aýrynyń 7 túrin tolyǵymen teksere almaıdy. Ol óz attarymyzdy Qazaqstannan shetelge shyǵara almaı otyrýymyzdyń bir sebebi osy. Bul máseleni Úkimet deńgeıinde kótergen durys», - dedi Talǵat Jaısanbaev.
Qazaq Jockey Club tóraǵasy Maqsat Ahaev Qazaqstannan ushaq arqyly atty shetelge shyǵarýǵa múmkindik joq ekenin aıtty.
«Sebebi, bizde at tasıtyn tasymaldaýshy joq. Kabırhannyń ıesi Tilek baýyrymyz sol úshin Reseı arqyly jylqymen Dýbaıǵa ushty emes pe. Aıtý kerek, álemdik klassıkalyq báıgelerge tek pasporty bar asyl tuqymdy attar ǵana qatysady. Eger elimizdiń júırik attaryn aparamyz desek, onyń qazaqy asyl tuqymdy at ekenin dáleldeıtin pasporty kerek», - dep atap ótti Maqsat Ahaev.
Eske salsaq, 12 qańtarda Dýbaıdaǵy Meıdan ıppodromynda ótken bedeldi báıgede qazaqstandyq Kabırhan esimdi tulpar jeńiske jetken edi. Onda 2000 metrge jarysqa 13 jylqy qatysty. Shabandoz Pet Dobbs mingen Kabırhan máre syzyǵyn birinshi bolyp kesti.
Keıin Al Maktoum Challenge týrnıriniń birinshi toptaǵy úzdik attar báıgesinde Tilek Muhanbetqalıevtiń tulpary Kabırhan máre syzyǵyn taǵy da birinshi bolyp kesken edi.
Bul jeńisten soń «Respýblıkalyq zaýyt jylqylary tuqymy palatasy» Prezıdenti Talǵat Jaısanbaev Kabırhannyń álemdegi eń úzdik ondyqqa kire alatyny jaıynda aıtqan edi.
