Almatynyń bıýdjet kiristeri bıyl alǵash ret 2,3 trln teńgeden asady
ALMATY. KAZINFORM — Almaty ekonomıkasy rekordtyq ósim kórsetip otyr. 2025 jyldyń qorytyndysy boıynsha megapolıstiń jıyntyq bıýdjet kiristeri alǵash ret 2,3 trln teńgeden asady dep josparlanyp otyr.
Almaty ákiminiń orynbasary Oljas Smaǵulovtyń aıtýynsha, mundaı nátıjege joǵary iskerlik belsendilik, ınvestıtsııalar kóleminiń artýy, salyq túsimderiniń ósýi jáne shaǵyn jáne orta bıznestiń belsendiligi sebep bolǵan.
2025 jyldyń 9 aıynyń qorytyndysy boıynsha jergilikti bıýdjettiń kiristeri 1,6 trln teńgege jetip, byltyrǵymen salystyrǵanda 19,3% artqan.
Negizgi úles kelesi salyqtarǵa tıesili:
• jeke tabys salyǵy — 618 mlrd teńge (+24,3%);
• korporatıvtik tabys salyǵy — 501 mlrd teńge (+10,3%);
• áleýmettik salyq — 323 mlrd teńge (+23,4%).
Ásirese shaǵyn bıznestiń úlesi aıtarlyqtaı artqan, olardan túsken salyqtar 30% ósip, 670 mlrd teńgege jetken. Іri bıznes 492 mlrd teńge (+17%) tólegen, al orta bıznes byltyrǵy deńgeıin saqtaǵan.
Oljas Smaǵulovtyń aıtýynsha, Almaty búginde eldiń basty ınvestıtsııalyq ortalyqtarynyń biri mártebesin nyǵaıtyp keledi.
2025 jyldyń qańtar-qyrkúıek aılarynda negizgi kapıtalǵa salynǵan ınvestıtsııalar 1,5 trln teńgege jetip, 20,7% ósken. Jeke ınvestıtsııalar da 1,1 trln teńgege deıin ulǵaıǵan.
— Jyl sońyna deıin negizgi kapıtalǵa ınvestıtsııa kólemin 2,3 trln teńgege deıin jetkizý josparlanyp otyr. Bul kórsetkish qala úshin absolıýttik rekord bolmaq, — dedi Oljas Smaǵulov.
Qalada búginde jalpy quny 3,6 trln teńgeden asatyn 189 joba júzege asyrylyp jatyr. Olar shamamen 33 myń jańa jumys ornyn qurýǵa múmkindik beredi.
Eske salaıyq, buǵan deıin Almatyda qala bıýdjeti 3,6 mlrd teńgege azaıtylyp, 2025 jyl úshin bıýdjet 2 trln 508,4 mlrd teńge bolatyny aıtylǵan edi.