Almatynyń birneshe kóshesinde qozǵalys shemasy ózgeredi
ALMATY. KAZINFORM — 23 mamyrdan bastap Almatyda Ýálıhanov kóshesiniń Qabanbaı batyr kóshesinen Qazybek bı kóshesine deıingi bóliginde soltústik baǵytta birjaqty qozǵalys engiziledi.
Sondaı-aq Jýkov kóshesinde (ońtústik baǵytta) jáne Manaev kóshesinde (soltústik baǵytta) Zataevıch kóshesinen Ahmedıarov kóshesine deıingi aralyqta birjaqty qozǵalys uıymdastyrylady.
Qalalyq jol qozǵalysy jáne jolaýshylar kóligin uıymdastyrý basqarmasynyń málimetinshe, sheshim Almaty polıtsııa departamentiniń ákimshilik polıtsııa basqarmasymen birlesip júzege asyrylyp jatyr.
— Bul kólik júktemesin azaıtýǵa, kóshe-jol jelisiniń ótkizý qabiletin arttyrýǵa jáne joldaǵy shıelenisti jaǵdaılar sanyn tómendetýge baǵyttalǵan. Ózgeris qazirgi kólik jaǵdaıyn taldaý jáne aýdan turǵyndarynyń ótinishin eskere otyryp qabyldandy, — delingen habarlamada.
Basqarma ókilderiniń málimetinshe, birjaqty qozǵalys pılottyq rejımde engiziledi. Onyń tıimdiligine júrgizilgen monıtorıng qorytyndysy boıynsha aldaǵy sheshimder qabyldanady.
Eske salaıyq, buǵan deıin Almatyda qoǵamdyq kólikke arnalǵan arnaıy jolaqtar jelisin keńeıtý, velojoldardyń uzyndyǵyn shamamen 40 shaqyrymǵa arttyrý jáne birqatar kóshede qozǵalys syzbasyn ózgertý josparlanyp otyr.
