Almatynyń biraz bóligi jaryqsyz otyr
ALMATY. KAZINFORM – Almatynyń birneshe aýdanynda búgin tústen keıin elektr qýaty óship qaldy.
«Alataý Jaryq Kompanııasy» ınteraktıvti kartasynda Asqartaý, Baǵanashyl, Ermensaı, Aqjar, Alǵabas, Shańyraq-1, Kók-Qaınar, Nurkent, Terekti shaǵyn aýdandary, sondaı-aq «Almaly» jáne «Vostochka» turǵyn úı keshenderi jaryqsyz otyrǵany kórsetilgen. Sonymen qatar Mámbetov, Áýbákirov kóshelerinde, Talǵar jáne Qulja tasjoldarynda da elektr jaryǵy óshken.
«Alataý Jaryq Kompanııasy» málimetinshe, saǵat 15:42-de Almaty energııa torabynda toq berý avtomatty túrde toqtap, apatqa qarsy avtomatıka júıesi iske qosylǵan. Buǵan «KEGOC» AQ (Qazaqstannyń ulttyq elektr jelisi operatory) qaramaǵyndaǵy elektr jetkizý jelileriniń apattyq túrde ajyratylýy sebep bolǵan.
— Saǵat 16:14-te júıe operatory Almaty óńirinde elektr qýatyn tolyq qalpyna keltirý týraly tapsyrma berdi. Qazirgi ýaqytta jelilerdi qaıta qosý jumystary júrgizilip jatyr, — dep habarlady kompanııadan.
Eske salaıyq, buǵan deıin Shymkentte aptap ystyqtan elektr jelileri isten shyǵyp, keı aýdanda jaryq sónip qalǵanyn jazǵanbyz.