Almatynyń bir bóligin qoıý tútin basty

ALMATY. KAZINFORM – Almaty oblysynyń «Pervomaısk» ónerkásip aımaǵynan shyqqan alapat órt atmosferalyq aýanyń nasharlaýyna áser etti. Sondaı-aq Almatynyń soltústik bóliginde qoıý qara tútinniń jınalýyna ákeldi. 

Almaty qalasynyń ekologııa jáne qorshaǵan orta basqarmasynyń málimetinshe, tańǵy 07:00-den 09:20-ǵa deıin tútin joǵaryǵa baıaý kóterilip, birneshe shaqyrymǵa sozyldy. Qala shegine shamamen 3 saǵat boıy tarady.

«Aıta keterligi, saǵat 12:00-den bastap qara tútin Almaty oblysynyń Іle aýdanyna aýysty. Bul - ýaqytsha qubylys», - dep habarlady basqarmadan.

24 qańtar kúni tańerteń Іle aýdanyndaǵy «Pervomaısk» óndiristik aımaǵynda polıetılen ónimderiniń qoımasy órtendi. 

Áleýmettik jelide alapat órttiń vıdeosy tarady.