Almatynyń botanıkalyq baǵynda mıdy tynyshtandyrýǵa kómektesetin gúl ósedi
ALMATY. KAZINFORM — Almatynyń botanıkalyq baǵynda «ǵajaıyp shóp» atanǵan gúl ósedi. Shúıginshóptiń emdik qasıetteri týraly Avıtsenna, Plınıı, Dıoskorıd aıtyp ketken.
Botanıkalyq baqtyń málimetinshe, dárilik shúıginshóp baqtyń ósimdikterdi jınaý aımaǵynda jáne Alpınarııde ósedi.
Dárilik shúıginshóp - bıiktigi 60-150 sm bolatyn kópjyldyq shóptesin ósimdik. Shúıginshóptiń kóptegen qońyr-sary baǵynyshty tamyrlary tyǵyz ornalasqan qysqa tik tamyry bar. Tamyrdyń erekshe ıisi bolady. Sabaqtary tik, gúl shoǵyrǵa jaqyn tarmaqtalǵan. Gúlder hosh ıisti, kishkentaı, dıametri 4 mm-ge deıin, aq, bozǵylt kúlgin nemese qyzǵylt tústi. Maýsym-shilde aılarynda gúldeıdi.
Otany – Jerorta teńizi.
«Shúıginshóptiń emdik qasıetteri ejelgi ýaqytta belgili bolǵan. Avıtsenna, Plınıı, Dıoskorıd shúıginshóptiń oılardy basqarýǵa, mıdy tynyshtandyrýǵa jáne nyǵaıtýǵa qabiletti dep eseptedi. Halyqtyq tájirıbede ósimdik qaınatpalar, tunbalar, untaqtar, syǵyndylar túrinde qoldanylǵan. Qazirgi eksperımenttik jáne klınıkalyq zertteýler shúıginshópti jáne onyń preparattaryn tıimdi sedatıvti, jumsaq uıyqtatatyn jáne spazmolıtıkalyq dári retinde sıpattaıdy. Shúıginshóp shóp shaılaryna jıi kiredi jáne asqazandy, tynyshtandyratyn jáne dıýretıkalyq shaılardyń taptyrmas komponenti»,- delingen habarlamada.
