Almatynyń Bostandyq aýdanyna 2026 jyly aýyzsý máselesi sheshiledi
ALMATY. KAZINFORM — Bostandyq aýdanyna qarasty «Ermensaı» shaǵyn aýdanynda aýyzsý tapshylyǵy máselesin sheshý maqsatynda reversıvti sý qubyrynyń qurylysy júrip jatyr.
Qalalyq energetıka jáne sýmen jabdyqtaý basqarmasynyń málimetinshe, joba júzege asqanda Ermensaı men irgeles turǵyn úı keshenderiniń turǵyndary táýlik boıy úzdiksiz sýmen qamtylady.
Jobany «SGGroup Sapa Stroı» JShS Almaty qalasynyń Energetıka jáne sýmen jabdyqtaý basqarmasymen birlesip, tehnogendik sıpattaǵy tótenshe jaǵdaıdyń aldyn alý jáne apattyq-qalpyna keltirý jumystary aıasynda júzege asyryp otyr.
Qurylys jumystary eki negizgi baǵytqa bólingen. Birinshi baǵyt — Ál-Farabı dańǵylynan «Sakura», «Silver Hills» jáne «Verona» turǵyn úı keshenderine deıingi aralyqta sorǵy stantsııasy salynyp, sý qubyry men elektr jelileri tartylady, jol tósemesiniń negizi daıyndalady. Bul jumysty 2025 jyldyń 1 qyrkúıegine deıin aıaqtaý josparlanyp otyr.
Ekinshi baǵyt — «Sakura» turǵyn úı kesheninen «Nurlytaý» sý daıyndaý stantsııasyna deıingi aralyqta qurylys jumystary 2025 jyly 25 jeltoqsanyna deıin jalǵasady. Al joldyń ústińgi qabatyn asfalttaý jáne kóriktendirý jumystary 2026 jyly naýryz-sáýir aılaryna josparlanǵan.
Sonymen qatar Ál-Farabı dańǵylynyń ońtústik jaǵynda jańadan sý burý júıesin ornatý kózdelgen. Ony qosý jumystary osy jyldyń tórtinshi toqsanynda júrgiziledi.
— Qazirgi ýaqytta ınjenerlik-geologııalyq jáne topografııalyq zertteý jumystary aıaqtalyp, jobalyq-smetalyq qujattama ázirlenip jatyr, sorǵy stantsııalary salynatyn oryndar naqtylandy. Búginge deıin 3,3 shaqyrymnan astam sý qubyry tartylyp, turǵyn úılerdi ýaqytsha sýmen qamtý úshin sorǵy stantsııasy men qubyr jelisi ornatylyp jatyr, — dep habarlady basqarmadan.
Eske salaıyq, buǵan deıin Medeýde ózenge laı aǵyp jatqanyn jazǵanbyz.