Almatynyń bıylǵy naqtylanǵan bıýdjeti 2,8 trln teńge boldy
ALMATY. KAZINFORM — 2026 jylǵa arnalǵan Almatynyń naqtylanǵan bıýdjeti 2 trln 806,4 mlrd teńge kóleminde bekitildi.
Bul týraly qalalyq ekonomıka jáne qarjy basqarmasynyń basshysy Baýyrjan Qudaıbergenov máslıhattyń kezekten tys XLII sessııasynda málimdedi.
Onyń aıtýynsha, túzetý bıýdjet qarajatyn ishki qaıta bólý esebinen júrgizilgen. Bul qosymsha jobalar jalpy bıýdjet kólemin arttyrmaı-aq qarjylandyrylatynyn bildiredi. Qarajat qalanyń damý basymdyqtaryn eskere otyryp qaıta bólingen.
Bıyl qańtarda qysqa merzimdi ekonomıkalyq ındıkator ındeksi 104,2% boldy. Ósim qurylys, óńdeý ónerkásibi jáne saýda salalary esebinen qamtamasyz etildi.
— 2026 jyly jalpy óńirlik ónimniń ósimi 6% deńgeıinde bolady dep boljanyp otyr. Bıýdjet qarajaty áleýmettik sala, ınfraqurylym jáne kólik júıesin damytýǵa baǵyttalady, — dedi Baýyrjan Qudaıbergenov.
Eske salaıyq, buǵan deıin Almatyda 2025 jylǵy bıýdjetke túzetý engizilgenin habarlaǵanbyz.
Memlekettik satyp alýlardyń nátıjesinde 19,5 mlrd teńge kóleminde qarajat únemdelgen. Osyǵan baılanysty shyǵyndardyń keıbirin qysqartý usynylǵan edi.