Almatynyń Alataý aýdanyna qashan jaryq beriledi
ALMATY. KAZINFORM — Almatynyń Alataý aýdany 13 qarasha kúni keshki ýaqyttan beri jaryqsyz otyr. Birneshe shaǵynaýdandy jaryqsyz qaldyrǵan iri apattan keıin elektr energııasyn tolyq qalpyna keltirý jumystary júrip jatyr. Bul týraly aýdan ákimi Danııar Qyryqbaev habarlady.
Ákimniń aıtýynsha, 13 qarasha kúni shamamen 18:00–de 110 kV № 124A jáne № 101A joǵary kerneýli jelilerinde apattyq ajyratý bolyp, birneshe shaǵyn aýdan elektr qýatynsyz qalǵan.
Mamandar túni boıy kúsheıtilgen rejımde jumys istep, saǵat 00:15–te L-101A jelisi tolyq qalpyna keltirilgen. 14 qarasha tańerteń Saıaly, Aqbulaq, Zerdeli, sondaı-aq «Sofıa», «Arena Park» turǵyn úı keshenderiniń turǵyndaryna, «Aqkent» jáne «Daraboz» keshenderine jartylaı jaryq berilgen.
Alaıda Terekti, Alǵabas, Nurkent, sondaı-aq Aqkent pen Darabozdaǵy jekelegen úıler áli jaryqsyz otyr.
Ákimniń málimetinshe, búgin saǵat 11:50–de jer asty kabelindegi zaqymdanǵan bólik anyqtalǵan. Qazir sol aýmaqta qazý jumystary júrgizilip jatyr. Barlyq qajetti materıal men tehnıka jetkizilgen.
Qazý jumystary aıaqtalǵannan keıin mamandar kabeldi qosý jáne jelini qalpyna keltirýge kirisedi.
Danııar Qyryqbaevtyń aıtýyna qaraǵanda, elektr energııasyn tolyq berý ýaqyty aldyn ala búgin saǵat 18:00 dep josparlanǵan.
Aýdan ákimi turǵyndardan túsinistik tanytýdy surap, apattyń joǵary kerneýli magıstraldyq jelilerde bolǵanyn, sondyqtan qalpyna keltirý qaýipsiz ári senimdi bolýy úshin ýaqyt qajet ekenin atap ótti.
Eske salaıyq, buǵan deıin 13 qarasha kúni 110 kV № 124A jáne № 101A elektr jelileriniń apatty ajyratylýy tirkelgenin jazǵanbyz.
Oqıǵa saldarynan birqatar iri qosalqy stantsııa — PS-162A «Alǵabas», PS-169A «Aqbulaq» jáne PS-123A «ATETs-2» ýaqytsha toqtan ajyratyldy.
Apattyń kesiri Alataý aýdanyndaǵy tutynýshylarǵa tıdi.