Almatynyń Ál-Farabı dańǵylynda jańa jolaıryq salynady
ALMATY. KAZINFORM – Almatyda Ál-Farabı dańǵyly men Jaqsylyq Úshkempirov kóshesiniń qıylysynda jańa kólik jolaıryǵyn salý josparlanyp otyr.
Qalanyń jol ınfraqurylymyn damytý basqarmasynyń málimetinshe, mamandar kólik júktemesi joǵary osy aýmaqta jol qozǵalysyn uıymdastyrýdyń birneshe nusqasyn qarastyryp, eń tıimdi sheshimge toqtalǵan.
— Ózge múmkindikterdiń shekteýli bolýyna qaraı Úshkempirov pen Qapparov kósheleriniń qıylysynda bir deńgeıli aınalma jolaıryǵyn salý jóninde sheshim qabyldandy. Bul joba barysynda ınjenerlik jelilerdi túbegeıli ózgertý qajet emes jáne jańa jer telimderin satyp alýdy qajet etpeıdi. Qurylys kezeńinde Ál-Farabı dańǵylyndaǵy qozǵalysty jabý da qajet bolmaıdy, — dep habarlady basqarmadan.
Qurylys-montajdaý jumystarynyń quny men merzimi jobalyq sheshimder ázirlenip, bekitilgennen keıin belgili bolady. Jobalaý jumystaryn aıaqtap, memlekettik saraptamanyń qorytyndysyn 2026 jyldyń qańtarynda alý josparlanǵan.
Eske salaıyq, buǵan deıin Ál-Farabı dańǵylynyń boıynda gaz qubyryn qaıta jańǵyrtý jumystary kelesi jylǵa aýystyrylǵanyn jazǵanbyz.