Almatyny gúlmen kómkerýge 2,6 mlrd teńge bólindi
ALMATY. KAZINFORM — Bıyl Almatyda 219639 sharshy metrden astam aýmaqty kógaldandyrý josparda bar. Onyń 64%-yn kópjyldyq ósimdikter alady — bul aldyńǵy maýsymdarǵa qaraǵanda bir jarym ese kóp.
Bul týraly Ekologııa jáne qorshaǵan orta basqarmasynyń Kazinform saýalyna joldaǵan jaýabynda aıtylǵan.
Basqarmadan málim etkendeı, 2025 jyly Almaty qalasynyń aýmaǵynda dekoratıvti-gúldi kógaldandyrý alańy 219 639 sharshy metr. Onyń ishinde 77 386 sharshy metr (36%) — birjyldyq ósimdikter, 142 myń sharshy metr (64%) — kópjyldyq.
— Budan bólek, 2024 jyldyń kúzinde shamamen 15 myń sharshy metr pııazshyqty gúlder otyrǵyzyldy. Qazir olar gúldeý fazasynda. Aýa raıy qolaıly bolǵan jaǵdaıda, qyzǵaldaqtar mamyr aıynyń ortasyna deıin qala turǵyndary men qonaqtarynyń kóz qýanyshy bolmaq, — dep atap ótti ákimdikten.
Mamandardyń aıtýynsha, qalalyq kógaldandyrýǵa arnalǵan ósimdikterdi tańdaý birneshe negizgi faktorǵa negizdelýi tıis.
Birinshiden — qolaısyz jaǵdaılarǵa tózimdilik. Qalalyq gúlder joǵary shańdylyqqa, ylǵaldyń jetispeýshiligine jáne temperatýra aýytqýlaryna tótep bere alýy kerek.
Sondaı-aq, qaladaǵy gúlzarlarǵa kelesi talaptar qoıylady: mehanıkalyq zaqymdarǵa tózimdilik, kólik gazdaryna shydamdylyq, kútimniń qarapaıymdylyǵy, uzaq gúldeý kezeńi.
Kógaldandyrý jumystary kezeń-kezeńimen júrgiziledi: Raýshan, ehınatseıa, lıleınık, lavanda, shalfeı, mıskantýs jáne gortenzııa sııaqty kópjyldyq ósimdikter qalalyq jaǵdaılarǵa óte tózimdi, kútimi az jáne uzaq gúldenýdi qamtamasyz etedi, bul otyrǵyzý materıalyn jyl saıyn aýystyrý qajettiligin azaıtady. Olardy otyrǵyzý 15 sáýirden 15 mamyrǵa deıin júzege asyrylady.
— Begonııa, petýnııa, geran, tagetıs, salvııa jáne taǵy basqalary — 1 mamyr men 10 maýsym aralyǵynda otyrǵyzylady. Kolambýs, Abba, Dınastı, Strong Gold, Lalıbella, Lıap Top — 10 qazan men 10 qarasha aralyǵynda egiledi. Osylaısha, qalalyq gúlzarlarda sáýirden qazanǵa deıin gúldeý qamtamasyz etiledi, — delingen jaýapta.
Qalanyń dekoratıvti-gúldi kógaldandyrýy bes jylda bir ret jańartylyp otyrady, bul jalpy sáýlet-kórkem kelbetti saqtaýǵa jáne ekologııa men estetıka salasyndaǵy zamanaýı talaptardy eskerýge múmkindik beredi. Gúl túrleri bekitilgen jobalyq sheshimge sáıkes irikteledi. Bul rette, birjyldyq ósimdikterdi qoldaný gúlzar dızaınyn jyl saıyn ózgertýge jaǵdaı jasaıdy.
Qalany abattandyrý tujyrymdamasy aıasynda negizinen sımmetrııany, geometrııalyq pishinderdi jáne aıqyn kompozıtsııalyq qurylymdy saqtaı otyryp, kórkemdeýdiń turaqty stıli qoldanylady.
Gúl kompozıtsııalarynyń eń tanymal túrleri — sferalyq jáne fıgýralyq elementter: sharlar, almalar, qalanyń eltańbasy, taqyryptyq pannolar, sondaı-aq kaskadty jáne tolqyndy otyrǵyzýlar. Zamanaýı tehnologııalar qalalyq gúlzarlardy jasaýda jańa múmkindikter ashady.
— Tiginen kógaldandyrý — shekteýli keńistik úshin barǵan saıyn tanymal sheshim. Modýldik júıeler gúl kompozıtsııalaryn jol aıryqtarynyń qorshaýlarynda, kóshe jaryqtandyrý tirekterinde jasaýǵa múmkindik beredi. 2025 jyly tiginen kógaldandyrýdyń 6 myńnan astam elementin ornatý josparlanǵan. Gúlzarlar men gúl alańdarynyń eskızderi merdiger uıymdar tarapynan ázirlenip, tapsyrys berýshimen mindetti túrde kelisilip bekitiledi, — dep jaýap berdi basqarmadan.
Maýsymdyq kógaldandyrý jumystaryna 300-den astam adam jumyldyrylady. Olardyń ishinde agronomdar, landshaft sáýletshileri, gúl ósirýshiler, kógaldandyrý mamandary bar. Sonymen qatar, 70-ten astam arnaıy tehnıka tartylady.
Kógaldandyrý kampanııasy jyl saıyn naýryz aıynda gúlzar topyraǵyn daıyndaýdan bastalyp, qarasha aıynda pııazshyqty gúlderdi otyrǵyzyp, kópjyldyq ósimdikterdi qysqa daıyndaýmen aıaqtalady.
Qalalyq aýmaqtardy kógaldandyrý baǵdarlamalary qalanyń barlyq aýdanyn qamtıdy. Budan basqa, jeke lotqa jol boıyna, magıstraldyq kóshelerdi, bólý jolaqtaryna kógaldandyrý jumystaryn júrgizý bólingen.
Ár aýdan boıynsha kógaldandyrý jumystaryna birjyldyq gúl kóshetterinen gúlzarlar jasaý, raýshan baqtaryn jáne kópjyldyq ósimdikterden gúlzarlar ornatý, sándik gúldeıtin butalardy otyrǵyzý, qyzǵaldaqtardy otyrǵyzý, sondaı-aq sáýirden qarashaǵa deıin kútim jasaý jumystary kiredi.
— 2025 jyly Almaty qalasyn dekoratıvti kógaldandyrý boıynsha aýqymdy sharalardy iske asyrýǵa jergilikti bıýdjet esebinen 2,6 mlrd teńge kóleminde qarjy qarastyrylǵan. Atalǵan jobalar megapolıstiń ekologııalyq jaǵdaıyn jaqsartýǵa ǵana emes, sonymen qatar qolaıly ári estetıkalyq tartymdy qalalyq ortany qalyptastyrýǵa baǵyttalǵan, — dep habarlady Ekologııa jáne qorshaǵan orta basqarmasynan.
Osyǵan deıin, bıyl Almatyǵa 320 myń aǵash otyrǵyzylatyny týraly jazǵan edik.