Inderbordaǵy eki balanyń ómirin qıǵan órt: kúdikti qamaýǵa alyndy

ATYRAÝ. KAZINFORM – Atyraý oblysynyń Inderbor kentinde páter órtenip, eki bala mert bolyp, eki adam aýrýhanaǵa túsken edi. Polıtsııa qyzmetkerleri órtke qatysy bar kúdiktini ustap, qamaýǵa aldy.

Atyraý oblystyq polıtsııa departamenti baspasóz qyzmetiniń aqparatyna qaraǵanda, Inderbor kentindegi páter órtine qatysty qylmystyq is qozǵalǵan.

«Inder aýdandyq polıtsııa bóliminiń qyzmetkerleri páter órtine baılanysty jedel izdestirý is-sharasyn júrgizdi. Sonyń nátıjesinde páter órtine qatysy bar kúdikti ustaldy. Qazir 31 jastaǵy kúdikti ýaqytsha ustaý ızolıatoryna qamaýǵa alyndy. Sot-medıtsınalyq saraptama taǵaıyndaldy. Sotqa deıingi tergeý bastaldy», - dep habarlady departamenttiń baspasóz qyzmeti.

Eske sala ketelik, buǵan deıin Atyraý oblysyndaǵy Inderbor kentinde órtten eki bala mert bolǵanyn jazǵan edik.

Keıin órtte kúıip qalǵan eki adamnyń jaǵdaıy aýyr ekenin habarlaǵan bolatynbyz.