Almatylyqtar Táýelsizdik monýmentine gúl shoqtaryn qoıdy
Almaty ákimi Erbolat Dosaev bastaǵan qala jurtshylyǵy Táýelsizdik monýmentine gúl shoqtaryn qoıdy, dep habarlaıdy Kazinform.
Onda Almaty qalasy ákimdigi, Qalalyq ardagerler keńesi, saıası partııalar men qoǵamdyq uıymdardyń ókilderi, 1986 jylǵy Jeltoqsan kóterilisine qatysýshylar, Aýǵan soǵysynyń ardagerleri, jastar uıymdarynyń ókilderi gúl shoqtaryn qoıyp, Táýelsizdik qurbandaryn bir mınýt únsizdikpen eske aldy.
«Qazaqstandyqtardy Táýelsizdik kúnimen quttyqtaımyn. Biz Táýelsizdikke qalaı qol jetkizgendigimiz týraly árdaıym este saqtap, keler jas urpaqqa jetkizýimiz kerek. Beıbit zamanda ómir súrip jatqan jastarǵa aıtarym: bilim alyńyzdar, sportpen shuǵyldanyp, ortaq úıimiz – Qazaqstandy birge kórkeıteıik», - dedi Jeltoqsan oqıǵasynyń ardageri, «Órshil rýh» qoǵamdyq birlestiginiń basshysy Serik Muhametalın.
Qoǵamdyq keńestiń múshesi, jazýshy Beknur Kısıkov jınalǵandarǵa bul kúniń qanshalyqty mańyzdy ekenin aıtty.
«Jyl saıyn osynda kelý men úshin úlken mártebe. Óıtkeni men 1986 jyly osynda boldym. Munyń bári meniń kóz aldymda ótti. Men úshin bul qasıetti mereke, qasıetti kún. Bul – eske alý kúni. Táýelsizdiktiń 32 jylynda biz barlyq salada kóp nársege qol jetkizdik. Álemdik arenada tanylý, dıplomatııalyq jáne ekonomıkalyq deńgeıde tanylý. Biz Ortalyq Azııadaǵy Ortalyq ekonomıkalyq draıvermiz. Bul kún 1986 jyly alǵash ret Táýelsizdik týraly oılaǵanymyzben qundy», - deıdi Beknur Kısıkov.
Esterińizge sala keteıik, qazirgi ýaqytta Almatyda 1986 jyly Jeltoqsan oqıǵasyna qatysqan 670 adam turady. Bıyl olarǵa beriletin birjolǵy tólem 150 myń teńgeden 250 myń teńgege deıin ulǵaıtyldy.
