Almatylyqtar merekelik kontsertten keıin qoqysty jınap ketti
ALMATY. KAZINFORM - Almatylyqtar «Taza Qazaqstan» baǵdarlamasyna belsendi qatysyp jatyr. Megapolıstiń Ortalyq stadıonynda bolǵan kontsertten keıin turǵyndar stadıon aýmaǵyn tazalaýǵa jappaı qatysty.
Ortalyq stadıonnyń aýmaǵyn tazalaýǵa Almaty jastary da qatysty. Munda 300-ge jýyq erikti boldy. Jastar qoqysty jınap, konteınerlerge tastady.
«Qalaǵa degen súıispenshilik tabıǵatqa degen súıispenshilikten bastalady. Osylaısha biz ortaq úıimizdiń ádemi kórinisin barynsha saqtaı alamyz! Biz kóppiz, al qala jalǵyz. Árkim óziniń ortaq úıine qamqorlyq jasaǵanda, qalanyń sulýlyǵy men jaılylyǵy saqtalady. Tabıǵat pen qalanyń úılesimdiligi árqaısymyzdyń qolymyzda. Kishkentaı qadamdar men jaýapkershilikpen biz qala ómiriniń sapasyn jaqsarta alamyz, sonymen qatar tabıǵatqa degen súıispenshiligimizdi kórsete alamyz. Bizdiń árqaısymyzdyń is-áreketimiz qalamyzdyń bolashaǵyna úlken áser etedi», - dedi almatylyq erikti Eldar Baıǵabylov.
Eske salaıyq, buǵan deıin Almatyda qala kúni qarsańynda 130 tonna qoqys jınalǵanyn jazǵanbyz.
