Almatylyqtar qandaı másele boıynsha jıi shaǵym túsiredi
ALMATY. KAZINFORM — Qala ákimdigi almatylyqtardyń ótinish-tilekterin qabyldaýǵa arnalǵan Open Almaty servısi jumysynyń 9 aılyq qorytyndysyn jarııalady.
Resmı málimetke sáıkes, 2025 jyldyń 1 qańtarynan 30 qyrkúıegine deıin Open Almaty qoǵamdyq qabyldaýyna 173 518 ótinish kelip túsken. Olardyń 69%-y jaýapty memlekettik organdarǵa jiberilmeı, sol jerde sheshimin tapqan.
Osy jyldyń 9 aıynda turǵyndardyń shaǵymy kóktem kezinde kóp bolǵan. Birinshi toqsanda (qańtar, aqpan, naýryz) — 49 981 (29%), ekinshi toqsanda (sáýir, mamyr, maýsym) — 73 220 (42%), al úshinshi toqsanda (shilde, tamyz, qyrkúıek) — 50 317 (29%) ótinish túsken.
Qala turǵyndary tarapynan eń jıi shaǵym qoǵamdyq kólikke qatysty túsken. Barlyǵy — 13 361 ótinish. Bul jalpy ótinishterdiń 21 paıyzy. Odan keıingi oryndarda:
* Injenerlik jeliler — 8 621 (13%);
* Joldardy jóndeý — 8 321 (13%);
* Aýmaqty tazalaý — 7 003 (11%);
* Kógaldandyrý — 5 281 (8%);
* Jaryqtandyrý — 3 573 (5%);
* Basqa da máseleler (jol qozǵalysy, quqyqtyq tártip, veterınarııa jáne t. b.) — 19 033 (29%).
Al qalanyń 8 aýdany ishinde eń kóp ótinish Bostandyq aýdanynyń turǵyndarynan túsken — 10 163 ótinish nemese 16%. Ekinshi orynda 8 109 (13%) shaǵym túsken Medeý aýdany, al úshinshi orynda Áýezov aýdany — 7 375 (11%). Odan bólek Alataý aýdanynan 6 373 (10%), Túrksib aýdanynan 6 141 (9%), Almaly aýdanynan 5 823 (9%), Naýryzbaı aýdanynan 4 043 (6%), Jetisý aýdanynan 3 742 (6%) ótinish túsken.
Eske salaıyq, buǵan deıin Almatylyqtar 1939 jylǵy órt sóndirý ǵımaratynyń tarıhı kelbetin saqtaýdy ótindi.