Almatylyqtar aftershok basylǵansha 384 qabyldaý pýnktin panalaı alady

ALMATY. KAZINFORM - Almatyda 384 qabyldaý pýnkti, onyń ishinde 229-y - mektepterde, 115-i balabaqshalarda, 15-i JOO-larda, 20-sy kolledjderde jáne 5-i stadıonda jumys istep tur.

Almaty ákimdiginiń málimetinshe, qazir aýdandyq ákimdikterdiń qyzmetkerleri osy jınalý oryndarynda júr.

«Pýnktter týraly barlyq málimetter Almatynyń 2GIS platformasynda ornalastyrylǵan. Qosymshanyń izdeý júıesinde „zardap shekken halyqty qabyldaý pýnkti“ sózin engizgen kezde kartada turǵyndardy jınaý pýnktteri kórsetiledi. Mundaı derekter Almaty qalasy jáne aýdan ákimdikteriniń TJD resmı saıttarynda da bar», — dep habarlady Almaty ákimdiginiń baspasóz qyzmeti.

Aıta keteıik, qazirgi tańda barlyq statsıonarlar, bosandyrý uıymdary, jedel medıtsınalyq kómek shtattyq rejımde jumys istep tur.

Saǵat 14:00-degi jaǵdaı boıynsha qabyldaý pýnktine 1232 adam habarlasqan.