Almatylyq zoobelsendiler haıýanattar baǵyndaǵy aq aıýdyń jaǵdaıyna alańdaýshylyq bildirdi
ALMATY. KAZINFORM – «Almaty janýarlaryna kómek» qoǵamdastyǵy Almaty haıýanattar baǵyndaǵy aq aıýdyń jaǵdaıyna qatysty jazba jarııalady.
Zoobelsendilerdiń pikirinshe, Almaty haıýanattar baǵyndaǵy Pýrga esimdi aq aıý qatty júdep ketken. Olar jelidegi paraqshalaryna aq aıýlardyń shyn máninde qandaı bolý kerek ekenin kórsetetin sýretterdi saldy.
«Aq aıýlardyń qandaı bolý kerek ekenin salystyryp kórińiz. Osydan bir jyl buryn Pýrga aq aıýynyń túri basqasha edi. Almaty zoobaǵynda ol osyndaı kúıge tústi. Sondaı-aq odan urpaq alý úshin zoobaq músheleri oǵan kúıeý izdep jatqanyn habarlady. Bolashaq ananyń mynadaı kúıde júre berýine jol bermeý kerek», - dep málimdedi zoobelsendiler.
Olar sondaı-aq zoobaqtan janýarlardy qorektendirýge múmkin qarajat qajet ekenin surady.
«Bálkim sizderge qarjy jınaýǵa kómek kerek shyǵar?.. Ol jaǵynan turǵyndar kómektesedi. Biz óz kúshimizben tek aýlanǵan jáne qańǵybas janýarlardy ǵana emes, memlekettiń zookollektsııasyn da qorektendiretin bolamyz», - dep jazdy zoobelsendiler.
Zoobelsendilerdiń kótergen máseleleri shyndyqqa janaspaıdy. Bul týraly Almaty haıýanattar baǵy resmı túrde málimdedi.
Haıaýanattar baǵynyń málimetinshe, Pýrga aq aıýy Almaty haıýanattar baǵyna 2023 jyly «Eýropalyq haıýanattar baǵy jáne akvarıýmdar qaýymdastyǵy» (EHBjAQ) baǵdarlamasy boıynsha Máskeý haıýanattar baǵynan ákelingen.
«Almaty zoobaǵy bul baǵdarlamanyń qatysýshysy bolyp tabylady. Sebebi, bizdiń zoobaqtyń aq aıýlardy kútip ustaýda úlken tájirıbesi bar. Áli kúnge deıin Alkor aq aıýy kóp adamnyń esinde bolar, ol bizdiń zoobaqta 32 jyl ómir súrdi, bul óz kezeginde erkindikte ómir súretin aq aıýlardan áldeqaıda uzaq ómir súrgenin kórsetedi. Almaty haıýanattar baǵynda aq aıýdy kútip ustaý jaǵdaılary men tamaqtanýy EHBjAQ jáne Máskeý haıýanattar baǵynyń (aı saıyn Pýrganyń jaǵdaıyn tekserip otyrady) talaptaryna sáıkes keledi», - dep jazdy zoobaq ujymy.
Sondaı-aq zoobaqtyń málimetinshe, bıyl aqpan aıynda EHBjAQ kýratorlary Douglas Richardson men Mats Höggren jáne Máskeý haıýanattar baǵynan Marına Galeşýk kelip, Pýrganyń ustaý jaǵdaıy men jeıtin tamaǵyn tekserip ketken. Aıýdyń eki basseınimen jalpy aýdany 750 m² bolatyn voleri bar. Onda ónerkásiptik kondıtsıoner men «sýyq» eden bar. Pýrganyń kúndelikti ratsıony: sıyr eti – 4,5 keli, taýyq eti – 2,5 keli, maıshabaq – 2 keli, qyzǵylt losos – 1 keli, mıntaı – 1 keli, sábiz – 1 keli, salat - 0,5 keli, alma – 1 keli, almurt – 0,5 keli.
Al aıýdyń usqynsyz fotosýretine keler bolsaq, onyń kúıi men syrtqy túrine áser etetin klımattyq jaǵdaıdy eskerý qajet. Onyń ústine kóktemde barlyq janýarlar, onyń ishinde aq aıýlar da túleıdi. Nátıjesinde kelbeti usqynsyz kóringen.
«Almaty janýarlaryna kómek» qoǵamdastyǵynyń Pýrga jaıly kótergen máseleleri shyndyqqa janaspaıdy jáne Almaty haıýanattar baǵynyń iskerlik bedeline nuqsan keltiredi. Bul materıaldyq jáne ımıdjdik zııan keltirýi múmkin. Shyndyqqa janaspaıtyn málimetti (jalǵan aqparatty) taratý QR zańnamasyna sáıkes ákimshilik jáne qylmystyq jaýapkershilikke ákeledi. Al janýarlardy kútip ustaý úshin zoobaq eshqandaı qarjylaı kómekke muqtaj emes. Ár adam zoobaqqa kelip, aq aıýlardyń laıyqty deńgeıde ómir súrip jatqanyn kórýine bolady», - dep jaýap berdi Almaty zoobaǵy jelide.
