Almatylyq LRT astanalyq jobadan nesimen erekshelenedi
ALMATY. KAZINFORM – Almatyda jeńil relsti kólik (LRT) jelisiniń qurylysyna baılanysty jańa málimetter jarııalandy.
Jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaevtyń aıtýynsha, jaqynda elordada iske qosylǵan LRT-dan almatylyq jobanyń basty aıyrmashylyǵy - relster tikeleı jer ústine salynady.
- Bastapqy joba boıynsha da jeli jer ústimen ótýi tıis. Óıtkeni Tóle bı kóshesinde burynǵy tramvaıdyń daıyn dálizi bar. Eger tramvaı qozǵalysy toqtaǵannan keıin olar buzylǵanda kólik jolaǵyn qoǵamdyq kólikke qaıta alý qıyn bolar edi. Júrgizýshiler ózderine tıesili jolaqty tartyp alǵandy unatpaıdy, biraq qazir ondaı másele joq. Sondaı-aq estakadalyq ınfraqurylymǵa qaraǵanda jer ústine rels salý áldeqaıda arzanǵa túsedi, — dedi Erjan Dıhanbaev.
Buryn Almatyda tramvaıǵa arnalǵan arnaıy jolaq Tóle bı kóshesinde ishinara ǵana bolǵan, joldyń basym bóliginde tramvaı men kólikter birge júrýge májbúr edi. Vedomstvo basshysy LRT jaǵdaıynda mundaı olqylyqtarǵa jol berilmeıtinin aıtty.
- Bul másele jan-jaqty pysyqtalyp jatyr. Eger LRT-ny iske qossaq, Tóle bı kóshesindegi avtobýs jolaǵynyń qajeti bolmaıdy. Ony jeńil kólikterdiń ıgiligine beremiz — dedi ol.
LRT jelisi joba boıynsha Abylaı han dańǵyly arqyly ótedi. Erjan Dıhanbaev trolleıbýstar men LRT birge kedergisiz qozǵalýy úshin atalǵan dańǵylda birjaqty qozǵalys uıymdastyrý josparda ekenin atap ótti.
Eske salaıyq, bıyl Almatyda LRT jobasynyń tehnıkalyq-ekonomıkalyq negizdemesi ázirlendi.
Qazir LRT qurylysyna daıyndyq aıasynda Almatyda burynǵy tramvaı relsteri alynyp jatyr.
