Almatylyq depýtattar sheteldik týrısterdi jarna tóleýden bosatýdy qoldady

ALMATY. KAZINFORM – Sheteldik týrıster jarna tóleýden bosatyldy. Bul usynysty Almaty qalasy máslıhatynyń depýtattary da qoldap otyr. Alaıda, keıbiri megapolıste týrısterden alym alynýy kerek dep esepteıdi. 

Almaty qalasy týrızm basqarmasynyń basshysy Ǵalııa Toqseıitova máslıhattyń kezekten tys sessııasynda megapolıste sheteldikter úshin týrıstik jarnanyń mólsheri 1 846 teńge ekenin aıtty ( 0,5 AEK). Budan ótken jyldyń basynan beri jergilikti bıýdjetke 650 mln teńge qarjy túsken. 

«Osy jyldyń 9 qańtarynan bastap QR Týrızm jáne sport mınıstriniń mindetin atqarýshy 2023 jyldyń 27 jeltoqsandaǵy buıryǵymen bekitilgen sheteldikter úshin týrıstik jarnany tóleý erejesine ózgerister zańdy kúshine endi, oǵan sáıkes týrıstik jarnanyń mólsheri Qazaqstannyń búkil aýmaǵynda nól teńge retinde bekitilgen», - deıdi Ǵalııa Toqseıitova.

Onyń aıtýynsha, 9-24 qańtar aralyǵynda joba NQA ashyq portalynda jarııa talqylaý rásiminen ótti, túsinikteme men usynystar túsken joq. 

«Sheteldik týrıster arasynda bizdiń qala keńinen tanymal. Máselen, 2023 jyldyń 9 aıynda Almatyǵa 409 myńnan astam adam keldi, bul 2022 jyldyń osy kezeńindegi kórsetkishten 51,5%-ǵa artyq. Osylaısha, megapolıs sheteldik týrısterdi qabyldaıtyn Qazaqstan qalalary arasynda kóshbasshy boldy. Osyǵan baılanysty, Almatyda týrıstik jarnany joıý qalanyń týrıstik ındýstrııasyn damytý úshin mańyzdy qadam bolyp tur. Osy jyly sheteldik týrıster sany 520 myń adamǵa, al 2030 jylǵa qaraı 1 mln adamǵa deıin ósedi dep josparlanýda», - dedi ol.

Atalǵan usynysty talqylaý barysynda máslıhat depýtaty Sergeı Kozlov týrıstik alymdar Almatyda bolýy kerektigin atap ótti.

«Bizdiń respýblıkada kórikti, tartymdy qalalar bar ekenin jaqsy bilemiz. Biraq, ózińiz aıtqandaı, kelýshiler sany boıynsha Almaty kósh bastap tur. Bul, árıne, qalanyń mártebesin kóteredi, qala bıýdjetine de 650 mıllıon teńge túsedi. Almatyǵa kóptegen týrıst túrli kólikpen keledi. Olar kólikpen Medeýge barady. Biz qorshaǵan orta úshin kúresemiz. Dúnıejúzindegi kóptegen qalalardyń tájirıbesinde týrıst azdaǵan aqy tóleıdi. Nelikten eldegi eń kórikti shahary bola tura kelgen týrısterden tıyn almaımyz? Bul qala bıýdjeti men ekologııasy úshin mańyzy zor. Aıtyńyzshy, bul úlgi qalaı retteledi? Qalanyń erekshe mártebesin paıdalana otyryp, bolashaqta muny ózgertý múmkin be? Óıtkeni bul tásil maǵan ádiletsiz bolyp kórinedi», - dep atap ótti depýtat.

Týrızm basqarmasynyń basshysy týrıstik jarnany engizý máselesin talqylaý óńirlik kásipkerler palatasynyń alańynda uıymdastyrylǵanyn, oǵan týrızm sektorynyń sýbektileri – týroperatorlar, jergilikti qonaq úı ıeleri shaqyrylǵanyn aıtty.

«Talqylaý qorytyndysy boıynsha týrıstik jarnany engizý ınfraqurylymdy damytý jáne qyzmet kórsetý sapasyn arttyrý turǵysynan jaqsartýdy talap etedi dep sheshildi. Sondyqtan, másele týrıstik ındýstrııa sýbektilerimen kelisildi, basqalardan eskertýler men usynystar bolǵan joq. Ony erekshe mártebe aıasynda qarastyratyn bolsaq, usynysty qabyldap, qosymsha habarlaımyz», - dep túıindedi sózin Ǵalııa Toqseıitova.

Birqatar depýtat jaýapty mınıstrlik bul buıryqty qaıta qaraýy kerek dep esepteıdi. Depýtat Nazerke Mundahanova týrıster úshin tıisti ınfraqurylymdy damytý úshin qalada qandaı sharalar qolǵa alynyp jatqanyn da surady.

«Qazir qalada birqatar ınvestıtsııalyq joba júzege asyrylyp jatyr. Sonyń ishinde jańa áýejaı termınalynyń qurylysy da bar. Aıaqtaý osy jyldyń maýsym aıyna josparlanǵan. Áýejaıdyń ótkizý qabileti jylyna 7-den 14 mıllıon jolaýshyǵa deıin artady. Sondaı-aq biz qalada qonaqúıler salý boıynsha 20 ınvestıtsııalyq jobany júzege asyryp jatyrmyz, bul 2700-den astam nómir. Іske asyrý merzimi: 2027 jyl. Osynyń barlyǵy qyzmet kórsetý deńgeıin de, qyzmet kórsetý sapasyn da arttyrýǵa múmkindik beredi», - dep jaýap berdi Ǵalııa Toqseıitova.

Eske salaıyq, osy jyldyń basynda Týrızm jáne sport mınıstrligi eldegi týrıstik salyqty alyp tastaý týraly buıryqqa qol qoıǵan bolatyn.