Almatylyq dárigerler aıaǵy synyp, durys bitpegen naýqasqa ota jasady
ALMATY. KAZINFORM — Ortalyq qalalyq klınıkalyq aýrýhanaǵa aıaǵy synyp, shor bolyp qalǵan 52 jastaǵy er adam tústi.
Aýrýhananyń baspasóz qyzmetiniń málimetinshe, naýqas aıaǵyn 1994 jyly syndyryp alǵan, durys bitpegen synyq saldarynan patsıenttiń súıekteri syrqyrap, bulshyq eti aýyrǵan.
30 jylǵa sozylǵan azapqa shydamaǵan er adam Ortalyq qalalyq klınıkalyq aýrýhanasynyń travmatologııa bólimine medıtsınalyq kómekke júgindi.
Travmatolog Nurjan Nuralynyń aıtýynsha, jan-jaqty tekserilgennen keıin patsıenttiń aıaǵyna operatsııa jasaý týraly sheshim qabyldandy. 1,5 saǵatqa sozylǵan operatsııa sátti ótti.
«30 jyl buryn synǵan aıaqqa operatsııa jasadyq. Hırýrgııalyq aralasý kezinde súıek ashylyp, syna tárizdi osteotomııa jáne ıntermodýlıarlyq buǵattaıtyn biligi bar osteosıntez jasaldy. Ota sátti ótti», - deıdi travmatolog Nurjan Nuraly
Qazir patsıenttiń jaǵdaıy jaqsy. Aldaǵy aılarda ol qalypty ómirge qaıta oralmaq.
«Qazir jaqsy, bári ornyna keldi. Qudaı qalasa, men 1-2 aıdan keıin júgirip ketemin dep oılaımyn», - deıdi naýqas.
Osyǵan deıin atalǵan ortalyq aýrýhana dárigerleri júreginde aqaýy bar naýqasqa ota jasap, ınfarktyń aldyn alǵan edi.
