Almatylyq dárigerler 35 jastaǵy naýqastyń mıynan úlken epıleptogendi oshaqty alyp tastady

Almatydaǵy Ortalyq qalalyq klınıkalyq aýrýhanada alǵash ret farmakorezıstenttik epılepsııa – mıdyń samaı bóliginiń rezektsııasymen sol jaq amıgdalohıppokampektomııasy bar naýqasqa kúrdeli ota jasaldy, dep habarlaıdy Kazinform. 

Almaty qalalyq qoǵamdyq densaýlyq saqtaý basqarmasynyń málimetinshe, naýqas atalǵan dertpen 20 jasynan aýyrǵan. Sońǵy kezderi oǵan ustamaǵa qarsy preparattar da kómektespegen. Keıin ustamalary kóbeıip, jaǵdaıy ýshyǵa túsken. 

Dárigerler onyń densaýlyǵyna tolyq tekseris júrgizdi. MRT naýqastyń mıynyń sol jaq samaı bóliginde epıleptıformdy belsendiliktiń oshaǵyn anyqtady.

Neırohırýrgııa bóliminiń meńgerýshisi Marat Almatov Novosıbırskiden kelgen neırohırýrg Aleksandr Dmıtrıevpen birge neıronavıgatsııa jáne mı qyrtysyn tikeleı jazý arqyly elektrokortıkografııa kómegimen naýqastyń sol jaq gıppokampyn mıkrohırýrgııalyq jolmen alyp tastaý operatsııasyn jasady. 

«Oń jaq mańdaı bóliktegi dıametri 3*3 sm bolatyn úlken epıleptogendi oshaqty alyp tastadyq. Ota sátti jasaldy. Odan keıin naýqasta epıleptıkalyq ustama bolǵan joq. Jasalǵan ota naýqastyń densaýlyǵyna oń áser etip, ary qaraı bári jaqsy bolady dep úmittenemiz», - dedi Marat Almatov. 

Onyń sózinshe, epılepsııa naýqastyń mı bólikterine zaqym keltirgen. 

Aıta keteıik, ota naýqasqa MÁMS sheńberinde jasaldy.