Almatyǵa álemniń úzdik jas shahmatshylary keldi
ALMATY. KAZINFORM – Almatynyń Balýan Sholaq atyndaǵy sport jáne mádenıet saraıynda shahmattan kadetter (U8, U10, U12) arasyndaǵy álem chempıonaty bastaldy. Jarys 30 qyrkúıekke deıin jalǵasady.
Atalǵan dodaǵa álemniń 88 elinen 850-den astam jas shahmatshy qatysady. Atap aıtqanda, Úndistan – 28, Qytaı – 25, AQSh – 24 sportshy qatysady. Qazaqstan namysyn 200-den astam adam qorǵaıdy.
Álem birinshiliginiń ashylýynda QR Premer-mınıstriniń orynbasary Ermek Kósherbaev qatysýshylarǵa sáttilik tiledi.
Al Halyqaralyq shahmat federatsııasy prezıdenti Arkadıı Dvorkovıch elimizdiń ońtústik astanasynda ótip jatqan halyqaralyq jarystyń ereksheligin atap ótti.
– Kadettar arasyndaǵy álem birinshiligi jyl saıyn ótedi jáne bul jarysqa eń úzdik jas shahmatshylar jınalady. Almatydaǵy týrnırdiń ereksheligi - munda jınalǵan federatsııalar ókilderiniń sany rekordtyq deýge bolady. 88 federatsııa óz delegatsııasyn jiberdi. Qazaqstan atynan 200-den astam bala qatysady, bul eldegi shahmat deńgeıiniń aıtaryltaı ósip kele jatqanyn kórsetedi, - dedi Halyqaralyq shahmat federatsııasy prezıdenti Arkadıı Dvorkovıch.
Al Qazaqstan shahmat federatsııasynyń prezıdenti Tımýr Týrlov halyqaralyq jarystyń jergilikti shahmatshylar úshin mańyzyna toqtaldy.
– Bul shahmattaǵy osy jyldyń basty oqıǵalarynyń biri deýge bolady. Sebebi shynaıy básekelestik kishi jas sanattarynan bastalady. Qazaqstanǵa týrnırde úlken kvota berildi. Sondyqtan bizdiń jas shahmatshylarymyz álemniń úzdikterimen baq synap, tájirıbe jınaı alady. Bıyl shahmatshylarymyz 100-den astam júlde ákeldi. Bul jarysqa da úmit artamyz, balalarymyz júldeli bolady dep senemiz, - dedi ol.
Eske salaıyq, bıyl Londonda ótken jyldam jáne blıts shahmattan komandalyq álem chempıonatynda Qazaqstan quramasy jaqsy nátıje kórsetip, komandalyq esepte kúmis júldeni ıelendi.