Almatydaǵy turǵyn úı shatyryndaǵy úı súrile me
ALMATY. KAZINFORM – Almatydaǵy kópqabatty úılerdiń biriniń tóbesine salynǵan jeke úıdi súrý týraly ákimdiktiń talabyna qatysty sot otyrysy júrip jatyr.
Qalanyń qala qurylysy baqylaý basqarmasy atalmysh nysanǵa qatysty Kazinform saýalyna jaýap berdi.
— 2025 jylǵy 30 mamyrda basqarma Almaty qalasy Almaly aýdany №2 aýdandyq sotyna Almaly aýdany, Qazybek bı kóshesi, 154/84 mekenjaıynda ornalasqan nysan boıynsha jeke tulǵalarǵa qatysty talap-aryz joldady. Qazirgi ýaqytta atalǵan talap-aryz sotta qaralý satysynda tur, — delingen basqarmanyń jaýabynda.
Buǵan deıin Jumalıev kóshesi, 84 mekenjaıyndaǵy 9 qabatty turǵyn úıiniń tóbesinde jeke úı salynǵany belgili boldy. Bul qurylys áleýmettik jelilerde narazylyq týǵyzdy.
Ákimdik nysan 2012 jyly zańdy negizde paıdalanýǵa berilgenin túsindirdi. Alaıda jelidegi qyzý talqylaýdan keıin ǵımarattyń quqyqtyq mártebesin rastaý úshin muraǵattyq qujattardy kóterýge ýáde etti.
Eske salaıyq, Almatyda jyl basynan beri 33 zańsyz qurylys nysany súrildi.