Almatydaǵy ózen-kólderde sý deńgeıi kóteriledi

ALMATY. KAZINFORM — Almatyda ózendegi sý deńgeıi kóterilýi múmkin.

— Almatynyń taýly aımaqtarynda jaýyn-shashynǵa baılanysty 11 mamyr kúni ózenderdegi sý deńgeıiniń kóterilip, keıbir aýmaqtarda sý tasýy múmkin, — dep habarlady Almaty qalalyq Tótenshe jaǵdaılar departamentinen. 

Sondaı-aq 12 mamyr túninde naızaǵaı oınap, nóser jaýyn bolady.

— Qala turǵyndary men qonaqtaryna qaýipsizdik sharalaryn saqtap, taý bókterleri men ózen arnalaryna jaqyndamaýǵa shaqyramyz, — dep atap ótti vedomstvodan.

Osyǵan deıin «Qazgıdromet» RMK el aýmaǵynda kún kúrkirep, burshaq jaýyp, jel kúsheıip, soltústikte, shyǵysta jáne ońtústik-shyǵystaǵy taýly aýdandarda jańbyr jaýatyny týraly eskertken. 

Aldaǵy aptada Almaty oblysynda aptap ystyq bolady. Osyǵan baılanysty oblystyq tótenshe jaǵdaılar departamenti óńir turǵyndaryna úndeý joldady.