Almatydaǵy órt: hostelde turyp jatqan stýdentter oqıǵa týraly aıtyp berdi
Almatydaǵy hostelde turyp jatqan stýdentter órt bastalǵan kezde ǵımarattan qalaı shyqqanyn aıtyp berdi, dep habarlaıdy Kazinform.
«Órt bolyp jatqanyn estip, qujattarymyzdy, kıimderimizdi alyp shyqtyq. Órt shyqqanyn estigende qatty ýaıymdadym. Birinshi qabatta turamyn. Qasymdaǵylar da aman. Bólmemiz syrtqy esikke jaqyn ornalasqan. Shyǵa almaǵandar, terezeden shyqty. Keıbiriniń qujaty ishte qaldy. Men ózim Iemennen keldim. Bul jerde turyp jatqanyma kóp ýaqyt bolmady», – deıdi stýdent Ahmed Faız Ahmed.
Taǵy bir sheteldik stýdent jataqhanadan shyǵý úshin terezeni syndyrǵanyn aıtty.
«Bizdiń bólmede tútinniń ıisi qatty boldy. Janymyzdaǵy adamdardyń jaǵdaıy aýyr edi. Ózimmen birge kerek dúnıelerimizdi alyp úlgere almadym. Bul hostelge kelgenime bir kún ǵana boldy. Keshe keshke keldim. Osyndaı jaǵdaıdyń oryn alǵany ókinishti», – deıdi taǵy bir sheteldik stýdent.
Endi biri shýdan, dabyldan jáne tútin ıisinen oıanǵanyn jetkizdi.
«Biz shýdan, dabyldan jáne tútin ıisinen oıandyq. Bir – birimizdi oıata bastadyq. Kórshi bólmelerdi aralap, bárin syrtqa shyǵýǵa shaqyrdyq. Men munda qonystanǵanyma eki aptaǵa jýyqtady. Bir bólmede jeti adam turamyz», – deıdi hostel turǵyny Nursultan Jurǵalov.
Eske salaıyq, Almatyda hostel órtenip, 13 adam qaza tapty. Qalalyq tótenshe jaǵdaılar departamentiniń málimetinshe, órt týraly habarlama 30 qarasha kúni saǵat 05:33–te túsken. Birinshi órt sóndirý bólimi shaqyrtý ornyna 7 mınýt ishinde jetti.
Órtten zardap shekken 2 adam qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy. 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.
Almatyda hostelde bolǵan órt týraly sońǵy málimetter myna jerde.
