Almatydaǵy keıbir kóshelerde qozǵalys ýaqytsha shekteledi
ALMATY. KAZINFORM — Almatynyń Bostandyq aýdanynda keıbir kóshelerde ýaqytsha qozǵalys shekteledi.
«Almaty Sý» memlekettik kommýnaldyq kásipornynyń málimetinshe, sý qubyryn aýystyrý jumystaryna baılanysty Myńbaev kóshesiniń jekelegen bólikterinde avtokólik qozǵalysyna ýaqytsha shekteýler engiziledi:
22 tamyz, saǵat 23:00–den 23 tamyz, 06:00–ge deıin jabylady:
* Áýezov kóshesi — Myńbaev kóshesiniń qıylysy;
* Jarokov kóshesi — Myńbaev kóshesiniń qıylysy.
23-24 tamyz, saǵat 23:00–den 06:00–ge deıin jabylady:
* Gagarın dańǵyly — Myńbaev kóshesiniń qıylysy.
25 tamyz, saǵat 09:00–den 26 tamyz, 06:00–ge deıin shekteledi:
* Rozybakıev kóshesi — Myńbaev kóshesiniń qıylysy.
25-28 tamyz aralyǵynda jabylady:
* Turǵyt Ozal kóshesi, Abaı dańǵyly men Sátbaev kóshesiniń arasyndaǵy bólik.
Kompanııa ýaqytsha shekteýler jol qozǵalysy qaýipsizdigin saqtaý jáne jóndeý jumystaryn sapaly atqarý úshin engizilgenin atap ótti.
— Myńbaev kóshesinde tozyǵy jetken aýyzsý jelileri qaıta jańartylyp jatyr. Joba iske asqanda osy aýmaqtaǵy 50 myńnan astam turǵyn turaqty ári sapaly sýmen qamtylady. Qala turǵyndary men júrgizýshilerden qozǵalys baǵytyn aldyn ala josparlap, ýaqytsha shekteýlerdi eskerýdi suraımyz, — delingen habarlamada.
Eske salaıyq, buǵan deıin Almatyda 24 tamyzda velosporttan álem chempıonatynyń ótýine baılanysty ál-Farabı dańǵyly ýaqytsha jabylatynyn jazǵan edik.