Almatydaǵy birneshe kóshege erteńnen bastap jańa ataý beriledi
ALMATY. KAZINFORM – Almaty qalasy máslıhatynyń kezekten tys XVIІІ sessııasy kezinde megapolıstiń keı kósheleriniń ataýyn ózgertý máselesi qaraldy.
Buǵan deıin qalalyq máslıhattyń jabyq otyrysy kezinde Almatydaǵy keıbir kóshelerdiń atyn ózgertý máselesi kóterilgeni habarlanǵan bolatyn. Atap aıtqanda, Gagarın dańǵylynyń Tımırıazev kóshesinen ál-Farabı dańǵylyna deıingi bóligin Ermek Serkebaev dańǵyly dep qaıta ataý, Áýezov aýdany ıÝbıleınaıa kóshesine Vladımır Tolokonnıkov atyn berý, Túrksib aýdany «Jas qanat» shaǵyn aýdanyndaǵy ataýsyz kóshege Eskendir Hasanǵalıevtiń esimin berý jáne Bostandyq aýdanyndaǵy ataýsyz kóshege ıÝrıı Pomerantsev esimin berý usynylǵan.
– Almaty qalasy máslıhatynyń 2024 jylǵy 14 mamyrdaǵy birlesken sheshimimen jáne Almaty qalasy ákimdiginiń qaýlysymen «Almaty qalasynyń kóshelerine ataýlar berý jáne qaıta ataý týraly» usynys Respýblıkalyq onomastıka komıssııasynyń qaraýyna jiberildi. 2024 jylǵy 29 mamyrda oń qorytyndy alyndy. Qaýlynyń jobasy 2024 jylǵy 14-28 mamyr aralyǵynda «Ashyq NQA» portalynda jarııa talqylaý úshin ornalastyryldy. Joba 16 myńnan astam qaralym men 1,5 myń pikir jınady. «Ashyq NQA» portalyna kelip túsken árbir túsiniktemeni zerdeleý jáne taldaý nátıjesinde paıdalanýshylardyń 88%-y E.Serkebaevtyń atyn berýdi, al paıdalanýshylardyń 98%-y ózge kóshelerge ataý berý týraly usynysty qoldaǵany anyqtaldy, - dedi Almaty qalasy ákiminiń orynbasary Beıbit Shahanov.
Óz kezeginde Qalalyq josparlaý jáne ýrbanıstıka basqarmasynyń basshysy Nurlan Boranbaev turǵyndar úshin mekenjaıdy aýystyrý rásimderi tegin bolatynyn aıtty.
– Biz mekenjaı regıstriniń bazasyn júrgizemiz. Mekenjaıdy ózgertý avtomatty júıede isteledi jáne azamattardyń ótinishine qaraı olarǵa jańa mekenjaılar beriledi. Bul rásimder jeke tulǵalar úshin de, zańdy tulǵalar úshin de tegin bolady, - dedi basqarma basshysy.
Qalalyq máslıhat depýtattary jańa ózgeriske biraýyzdan daýys berdi. Máslıhat sheshimi erteńnen bastap kúshine enedi.
