Almatydaǵy avtobýs apaty: marqumnyń otbasy júrgizýshini keshirdi
ALMATY. KAZINFORM – Almatyda «5:32» veb-serıalynyń prodıýseri sebepker bolǵan jol apatyna qatysty sot otyrysy bolyp jatyr.
Іs Almaly aýdandyq sotynda QR Qylmystyq kodeksi 345-babynyń 3-bóligi boıynsha is qaraly jatyr. 28 jastaǵy áıelge kólik quralyn basqarý kezinde jolda júrý qaǵıdalaryn buzý, onyń ishinde abaısyzda adam ólimine ákep soǵý baby boıynsha aıyp taǵylyp otyr.
Sot otyrysynda Anel Sartaeva óz kinásin tolyq moıyndap, ókinetinin jetkizdi. Sonymen qatar, ol apattyń qalaı bolǵanyn aıtyp berdi.
«Men saǵat 13:55-te úıimde qalǵan 4 aılyq qyzymdy tamaqtandyrýǵa bara jytyr edim. Masanshy kóshesimen kele jatyp, Lotus bıznes ortalyǵynan keıin shlagbaýmnan ótip, sol jaq baǵytta kele jatqan kólikterdi ótkizdim. Kóshede baǵdarsham bolmaǵandyqtan, joldyń bosaǵanyn kúttim. Maqataev kóshesin kesip ótip, Masanshy kóshesimen joǵary qaraı qozǵala bastaǵanda soqtyǵystyq. Kóliktiń qaýipsizdik jastyqshasy ashylyp, biraz ýaqyt esimdi joǵalttym. Adamdar maǵan kómektesýge júgirdi, men birden avtobýsqa qaraı bet aldym. Jedel járdem shaqyrdym, biraq telefon jelisi bos emes edi. Keıin polıtseıler kelip, kólik ıesiniń kim ekenin surady. Men barlyq qajetti qujatty berdim. Tergeý aıasynda óz kinámdi birden moıyndap, ár shaqyrtýǵa kelip turdym», – deıdi ol.
Sottalýshy sotqa deıingi tergep-tekserý barysynda onyń otbasy barlyq jábirlenýshimen kezdesip, moraldyq jáne materıaldyq shyǵyndy ótegenin atap ótti. Sondaı-aq sot otyrsynda A. Sartaeva barlyq jábirlenýshi men marqumnyń týystarynan keshirim surady.
«Jábirlenýshilerden keshirim suraımyn. Qatty ókinemin jáne qanshalyqty ókingenimdi sózben aıtyp jetkize almaımyn. Bul zor qaıǵy ekenin bilemin. Kóńil aıtamyn. Ótinemin, meni barlyq bolǵan jaǵdaı úshin keshirińizdershi», - dep jylady aıyptalýshy.
Jol apatynan qaza tapqan marqumnyń aǵasy baýyrynyń saýda ortalyǵyndaǵy aıaq kıim dúkeninde jumys istegenin atap ótti. Sol kúni ol avtobýspen júrgen. Baýyrynyń jol apatyna ushyraǵany týraly keshke qaraı estigen, oǵan deneniń máıithanaǵa baǵyttalǵany habarlanǵan.
Sondaı-aq ol aıyptalýshynyń ákesi materıaldyq jáne moraldyq shyǵyndy óteýdi usynǵanyn, alaıda bas tartqanyn aıtty. Óıtkeni olardyń otbasynda aqsha máselesi joq. Sondaı-aq ol aıyptalýshyny keshiretinin jetkizdi.
Eske salaıyq, 26 maýsym kúni qoǵamdyq kólik pen jeńil mashına soqtyǵysqan edi. Saldarynan 16 adam jaraqat alyp, bir adam qaza tapty.
Keıin qoǵamdyq kólik kamerasy túsirgen beınejazba jelide tarady.
Avtobýstyń apatqa ushyraýyna «5:32» veb-serıalynyń prodıýseri sebepker bolǵan.
Keıin kúdikti dep tanylǵan jeńil kólik júrgizýshisi Anel Sartaeva tergeý ýaqytynda úı qamaǵynda bolatyny týraly jazǵan edik.
