Almatydaǵy ATP 250 týrnıriniń jeńimpazdary anyqtaldy

ALMATY. KAZINFORM – Almaty qalasynda ATP 250 týrnıri máresine jetti. 

Jekeleı synda álemniń 14-raketkasy, reseılik Danııl Medvedev pen reıtıngide 41-orynda turǵan frantsııalyq Korenten Mýte chempıondyq ataqty sarapqa saldy.

Birinshi partııa 7:5 esebimen reseılik tennısshiniń paıdasyna sheshildi. Ekinshisinde frantsııalyq sportshy ese qaıyrdy – 6:4. Degenmen sheshýshi sette Medvedev jeńisti julyp aldy – 6:3.

Osylaısha, óz sporttyq jolynda ATP jarystarynda qyrqynshy ret fınalǵa shyqqan D.Medvedev 21-tıtýlyn jeńip aldy. Ol buǵan deıingi chempıondyq ataǵyna 2023 jyldyń mamyr aıynda qol jetkizgen edi. 

– Keıde oıynyma kóńilim tolmaıdy. Biraq jeńistiń orny bólek. Bul – matchtyń eń mańyzdy kezeńinde jaqsy oınadym degen sóz. Ásirese, sheshýshi geım erekshe boldy. Tıtýldy jeńip alǵanyma qýanyshtymyn. Osymen 21 qalada 21 trofeıge ıe boldym, - dedi D.Medvedev oıynnan soń. 

Juptyq synda frantsııalyqtar Teo Arrıbaj ben Albano Olıvettı úzdik shyqty. Olar fınalda germanııalyq ıAkob Shnaıtter men Mark Valnerden aılasyn asyrdy - 6:4, 7:6 (10:8).

Arrıbaj juptyq synda ATR dodasyndaǵy ekinshi, Olıvettı úshinshi tıtýlyn jeńip aldy. 

– Bul shynynda da keremet apta boldy. Biz babymyzǵa kelip, naǵyz komanda retinde oınadyq. Kúrdeli matchtar boldy, biraq aıaǵyna deıin kúresip, jeńýdiń amalyn taptyq. Bıyl Almatyda jeńimpaz atanǵanymyzǵa óte qýanyshtymyz. Shynynda da bul ATP 250 deńgeıindegi tamasha týrnır boldy. Jarys joǵary dárejede uıymdastyryldy. Jankúıerler bizdi myqty qoldady. Barshańyzǵa myń alǵys, - dedi matchtan soń týrnır chempıondary.

Eske sala keteıik, budan buryn Elena Rybakınanyń Qytaıdaǵy týrnırde úzdik shyqqanyn shyqqanyn jazǵan edik.