Almatyda jolaýshy tasymaldaýshy kompanııalarǵa 4 mlrd teńgeden astam sýbsıdııa artyq tólengen
Almatyda 2017 jyldan bastap jolaýshylardy tasymaldaýshy kompanııalardyń shyǵyndaryn sýbsıdııalaý bastalǵan, dep habarlaıdy QazAqparat tilshisi.
Almaty qalalyq mobıldilik basqarmasynyń málimetinshe, megapolıste búgingi kúni 23 jeke jáne 1 kommýnaldyq avtobýs parki jumys isteıdi. Olar 164 qalalyq jáne qala mańyndaǵy marshrýttarǵa qyzmet kórsetedi. 2017 jyldan bastap tasymaldaýshylardyń shyǵyndaryn sýbsıdııalaý bastalǵan.
2017 - 2022 jyldar aralyǵynda 148,9 mlrd teńge sýbsıdııa tólengen:
- 2017 jyly - 0,3 mlrd teńge
- 2018 jyly – 9,2 mlrd teńge
- 2019 jyly - 23,6 mlrd teńge-
2020 jyly - 24,1 mlrd teńge
- 2021 jyly - 43,9 mlrd teńge
- 2022 jyly - 47,8 mlrd teńge.
«2023 jyly sýbsıdııa kólemi 85,6 mlrd teńge bolady dep boljandy. Bıylǵy qańtar-shilde aılary aralyǵynda tóleýge jatatyn soma 39,855 mlrd teńgeni qurady. Іs júzinde 37,834 mlrd teńge tólendi. Qalǵan 2 mlrd teńge tasymaldaýshylarǵa tólenip jatyr. Bastapqyda áleýmettik mańyzy bar baǵyttardy sýbsıdııalaý úshin 55,9 mlrd teńge bólingen. Megapolıstiń jergilikti bıýdjetin sońǵy ret qaıta qaraǵan kezde qosymsha 10 mlrd teńge bólindi. Bul tasymaldaýshy kompanııalardyń memleketten qosymsha qarjylyq qoldaý alatynyn kórsetedi. Osylaısha sýbsıdııalar ýaqtyly tólenýde, alaıda, ol sýbsıdııalardy paıdalaný tasymaldaýshylardyń óz jospary negizinde iske asady», - dep habarlady vedomstvodan.
Aıtý kerek, Almatyda sýbsıdııaǵa bólinetin qarajattyń jetkiliksizdigi týraly máseleni jyl saıyn belgili tasymaldaýshy kompanııalar kóterip keledi.
«Ótken jyly ótken aýdıtorlyq tekseristiń nátıjesi boıynsha bul tasymaldaýshylardyń 0,9 mlrd teńge kóleminde dıvıdend alǵany anyqtaldy. Odan bólek, jolaýshylardy tasymaldaýshy kompanııalardyń tarıftik esepterinde shyǵyndarǵa baǵany kóterý túrindegi buzýshylyqtar anyqtaldy. Osyǵan baılanysty qala ákimdigi tasymaldaýshylarǵa salyq tóleýshilerdiń esebinen 4 mlrd teńgeden astam qarjyny artyq tólegen. Qazir bul soma kestege sáıkes aı saıyn tasymaldaýshylardan ustalyp otyrady», - dep habarlady Almaty qalalyq mobıldilik basqarmasy.
Sondaı-aq Almatyda janar-jaǵarmaıdyń baǵasy ósýine baılanysty tasymaldaýshy kompanııalar qalalyq mobıldilik basqarmasynan esep aıyrysý tarıfin qaıta qaraýǵa ótinish bildirgen. Vedomstvonyń málimetinshe, «Áleýmettik mańyzy bar jolaýshylar tasymaldaryn júzege asyrýmen baılanysty tasymaldaýshylardyń shyǵyndaryn bıýdjet qarajaty esebinen sýbsıdııalaý qaǵıdalarynyń» 7-tarmaǵy jáne Tarıfterdi esepteý ádistemesine sáıkes, tasymaldaýshylar basqarmaǵa marshrýttarǵa arnalǵan tarıfterdiń esebin usynýy tıis. Ol esepter ýaqytyly berilmegen, sol sebepti esep aıyrysý tarıfi qaıta qaralǵan joq.
«Basqarma sondaı-aq qysqy kezeńge daıyndyqqa baılanysty 5 qyrkúıekte tasymaldaýshylarǵa tarıftik esepter men basqa da tıisti qujattardy usynýdy eskertken. Tasymaldaýshylar tarıfter boıynsha jańa esepterdi resmı usynǵan. Degenmen, búginge deıin áli 56 marshrýt boıynsha esepter usynylǵan joq. Aıta keteıik, tasymaldaýshylar qajetti qujattardy tolyq usynǵan jaǵdaıda ǵana tarıftik komıssııa qurylady», - dep habarlady qalalyq mobıldilik basqarmasy.
