Qyzylordada jaryq nege jıi óshetin boldy?

QYZYLORDA. KAZINFORM — Qyzylorda oblysynda elektr qýatyn berýde irkilistiń jıileýi men jaryq sapasyna qatysty aryz-shaǵym jıiledi. Buǵan Qyzylorda elektr taratý toraptary kompanııasy túsinikteme berdi.

Kompanııa 199 myń tutynýshyǵa qyzmet kórsetedi. Alaıda, sońǵy ýaqytta kúnniń kúrt ysýyna baılanysty másele týyndap, tutynýshylardy elektr qýatymen jabdyqtaý isine narazylyqtyń kóbeıgenin kompanııa basshylyǵy rastap otyr. 

— Onyń bir sebebi syrttan keletin elektr jelilerindegi kerneý deńgeıiniń (220/35 kV) jalpy júıede turaqty bolmaýyna (220 kV-214kV) baılanysty. Qyzylorda jylý elektr ortalyǵyndaǵy deńgeı — 220-208 kV, 35-32,33 kV. Osynyń saldarynan áýe jelileri men qondyrǵylaryna elektr qýaty óz deńgeıinde jetpeı jatyr. Bul óz kezeginde tutynýshylarǵa turaqty, sapaly elektr qýatyn jetkizýge kedergi, — delingen habarlamada.

Degenmen, Qyzylorda elektr taratý toraptary kompanııasy elektr kerneýiniń deńgeıin kóterý úshin qosalqy stantsııalardyń elektr jelilerinde jumysty kúsheıtkenin málimdedi. 

— Óńirdiń qarqyndy damýyna baılanysty oblys ákimdigimen, «KEGOK» kompanııasymen, Qyzylorda jylý elektr ortalyǵymen birge elektr qondyrǵylaryn, áýe jelilerin jańǵyrtý jumysyn qarqyndy túrde júrgizip jatyrmyz. Másele qatań baqylaýda, halyqty túsinistikpen qaraýǵa shaqyramyz, — delingen kompanııa habarmalasynda.

Jyl basynda biz Qazaqstan elektr energııasyn kóp tutynatyn ýaqytta kórshiles elderden qymbat baǵamen satyp alýǵa májbúr ekenin jazǵanbyz.