Almatyda jol apatynan 39 jastaǵy áıel mert boldy

ALMATY. KAZINFORM - Almatyda adam ólimine ákelgen jol-kólik oqıǵasy boldy.

Almaty qalasy Polıtsııa departamentiniń málimetinshe, jol-kólik oqıǵasy keshe tańǵy saǵat 05:30–da Bostandyq aýdanynda bolǵan. «Toıota» markaly kóliktiń 20 jastaǵy júrgizýshisi ál-Farabı dańǵylynyń boıymen batys baǵytta kele jatyp, Qarataev kóshesiniń qıylysynda kólikti basqara almaı qalǵan. Saldarynan joldyń soltústik jıegindegi trotýarǵa shyǵyp, 39 jastaǵy jaıaý júrginshini qaǵyp ketken. Sondaı-aq kólik jarnama taqtasynyń tiregine soǵylyp, aýdarylǵan.

— Ókinishke qaraı jol apaty saldarynan jaıaý júrginshi oqıǵa ornynda kóz jumdy. Kólik júrgizýshisi men onyń jolaýshysy qalalyq aýrýhanalardyń birine jatqyzyldy. Kisi ólimine ákelip soqqan jol-kólik oqıǵasyna qatysty qylmystyq is qozǵaldy, - dep habarlady qalalyq PD baspasóz qyzmeti.

Eske salaıyq, buǵan deıin Almatyda mas kúıinde kólik júrgizgen 500 júrgizýshi kólik basqarý quqyǵynan aıyrylǵanyn jazǵanbyz.