Almatyda joǵalyp ketken qyzdyń denesi tabyldy

ALMATY. KAZINFORM – Bıyl qazan aıynyń sońynda joǵalyp ketken Almaty turǵynynyń denesi tabyldy.

Lider.kz uıymynyń málimetinshe,1994 jyly týǵan Áıgerim Sýpataeva 26 qazan kúni joǵalyp ketken. Keshki saǵat 21:00-de Medeý aýdany, Shevchenko kóshesi, 15A úı mekenjaıyndaǵy úıinen shyǵyp ketip, sol kúıi oralmaǵan. 

Almaty qalalyq polıtsııa departamenti, 30 qazan kúni Almaly aýdanyndaǵy úılerdiń birinen zorlyq-zombylyq belgileri joq Áıgerim Sýpataevanyń denesi tabylǵanyn habarlady.

«Sot-medıtsınalyq saraptamasynyń qorytyndysyna sáıkes, ólimge júrek aýrýy sebep bolǵan», - dep atap ótti Almaty polıtsııa departamentiniń resmı ókili Saltanat Ázirbek.

Osyǵan deıin Almaty oblysynda 51 jastaǵy er adamnyń máıiti tabylǵany týraly jazǵan edik.