Almatyda jylý qashan óshirile bastaıdy
ALMATY. KAZINFORM — Almatyda 2025-2026 jyldarǵa arnalǵan jylytý maýsymyn aıaqtaý týraly sheshim qabyldandy.
Qalalyq energetıka jáne sýmen jabdyqtaý basqarmasy ókilderiniń málimetinshe, aýa raıynyń jylynýyna jáne syrtqy aýanyń ortasha táýliktik temperatýrasynyń bes táýlik qatarynan +8 gradýstan joǵary turaqty saqtalýyna baılanysty jylý berý 3 sáýirden bastap kezeń-kezeńimen toqtatylady.
Jylý júıesin óshirý jumystary belgilengen tártippen júzege asyrylady: aldymen ákimshilik ǵımarattar, keıin turǵyn úıler, al eń sońynda áleýmettik nysandar qamtylady.
Basqarma ókilderiniń aıtýynsha, jylytý maýsymy qalypty rejımde ótti.
— Qala turǵyndaryna jylý men elektr qýaty turaqty jetkizilip, jylý kózderi men jelilerindegi temperatýralyq talaptar tolyq saqtaldy. Jylytý kezeńinde qala qyzmetteri joǵary daıyndyq rejıminde jumys istedi. Tótenshe jaǵdaılardyń aldyn alý jáne jedel áreket etý maqsatynda qajetti qural-jabdyqtarmen qamtamasyz etilgen apattyq brıgadalar jasaqtaldy. Jalpy alǵanda, 104 apattyq brıgada quramynda 400-ge jýyq maman jáne 100-den astam arnaıy tehnıka jumyldyryldy, — delingen habarlamada.
2025 jyly 39 shaqyrym jylý jelisi jańǵyrtylyp, 17 qazandyq jańartyldy, sondaı-aq 67 qazandyqta jóndeý jumystary atqaryldy.
Eske salaıyq, buǵan deıin Almatyda jylytý maýsymy bastalǵaly 153 órt tirkelgenin habarlaǵan edik.