Almatyda jyl basynan beri 200-ge jýyq buralqy ıt aýlandy

ALMATY. KAZINFORM – Almatyda buralqy ıt, mysyqtardy aýlaý jumystary qalalyq veterınarııalyq qyzmetiniń dıspetcheri, 109 birińǵaı qyzmeti, azamattardyń ótinishin qabyldaıtyn biryńǵaı E-ótinish platformasy men Almaty ákimdiginiń qoǵamdyq qabyldaý bólmesi Open Almaty-ǵa kelip túsken ótinimder negizinde júrgiziledi. Bul týraly Kazinform tilshisi jibergen saýalǵa Almaty ákimdiginiń bergen jaýabynda aıtyldy. 

Ákimdiktiń málimetinshe, Almatyda buralqy ıtterdi azaıtý maqsatynda aýlanǵan ıtterdi aýlaý, pishtirý, vaktsınalaý, bosatý jáne asyrap alý jumystary júrip jatyr. Bul jumystar tek kınologııalyq testten ótken ıtterge ǵana jasalady.

«Mamandar aýlanǵan ıtterdi klınıkalyq tekserýden, oba, trıhofıtııaǵa arnalǵan jedel testten jáne kınologııalyq testten ótkizedi. Ary qaraı janýarlardy pishtirý, vaktsınalaý, syrǵa salý jáne arnaıy mıkrochıpti engizý jumystary jasalady. Ótken jyly Almatyda 6 900 buralqy ıt pen 229 mysyq aýlandy. Qazirgi tańda Almatyda qańǵybas ıtterge arnalǵan bir panajaı bar, ol panajaıda 400 bas ıtke oryn bar. Ol panajaıǵa túsken ıtterge jańa ıeler izdelinedi. Eger olar tabylmasa, janýarlar sol jerde ómir boıy baǵyp kútiledi. Ótken jyldarmen salystyrǵanda Almatyda 2023 jyly qańǵybas ıtterdiń sany azaıǵan. Jańa jyldyń basynan Almatyda 184 bas qańǵybas ıt aýlandy», - dep habarlady Almaty ákimdigi.

Sondaı-aq ákimdik qalada buralqy ıt, mysyqtardyń sanyn azaıtý boıynsha ary qaraı qandaı jumystar júrgizý qajettigin habarlady.

«Birinshiden, janýarlarǵa jaýapkershilikpen qaraý jóninde qala turǵyndaryna úgit-nasıhat jumystaryn nyǵaıtý kerek. Ekinshiden, aýlaý qyzmetimen aýlanǵan jáne qala turǵyndarynyń úılerinde ustalatyn janýarlardy pishtirý jumysyn damytý kerek», - dep habarlady Almaty ákimdigi.