Almatyda jyl basynan beri 12 myń adam menıngıt qaýpine tekserildi
ALMATY. KAZINFORM — Almatyda menıngokokk ınfektsııasyn juqtyrǵandardyń sany ótken jylmen salystyrǵanda kishkene artqan. Bul týraly Almaty qalasynyń Sanıtarııalyq-epıdemıologııalyq baqylaý departamenti habarlady.
Departament basshysynyń orynbasary Ásel Qalyqovanyń aıtýynsha, 2024 jyldyń basynan beri Almaty qalasynda zerthanalyq naqtylanǵan menıngokokk ınfektsııasynyń 8 jaǵdaıy tirkelgen. Onyń ishinde 14 jasqa deıingi balalar arasynda 3 jaǵdaı jáne eresekter arasynda 5 jaǵdaı. 2023 jyldyń osy kezeńinde menıngokokktyq ınfektsııasynyń 7 jaǵdaıy tirkelgen edi, onyń ishinde 14 jasqa deıingi balalar arasynda 2 jaǵdaı.
— Epıdemıologııalyq kórsetkish boıynsha menıngokokk ınfektsııasynyń oshaqtarynda naýqaspen baılanysta bolǵan 269 adam tekserildi, olardyń ishinde bakterııa tasymaldaýshylar anyqtalmady. Aldyn alý maqsatynda menıngokokk ınfektsııasyna 11194 adam tekserildi, onyń ishinde jabyq mekemelerge qabyldaý kezinde 5553 adam jáne «qaýip tobyndaǵy» 5641 adam, olardyń arasynda ınfektsııa tasymaldaýshylar anyqtalǵan joq, — dedi Ásel Qalyqova.
Eske salaıyq, buǵan deıin BQO-da vırýstyq menıngıtpen aýrýhanaǵa júginýshiler sany 3,7 esege artqanyn jazǵanbyz.
Sondaı-aq Almatyda 5 myńǵa jýyq qyz APV-ǵa qarsy vaktsına alǵanyn jazǵan edik.
