Almatyda Jeńistiń 80 jyldyǵy atalyp ótti
ALMATY. KAZINFORM — Almaty ákimi Erbolat Dosaev Máńgilik alaýǵa gúl shoqtaryn qoıý rásimine qatysty.
Uly Otan soǵysyndaǵy Jeńistiń 80 jyldyǵyna oraı Almatydaǵy 28 gvardııashy-panfılovshylar atyndaǵy saıabaqta negizgi merekelik is-sharalar ótti. Osy jerde qala ákimi Erbolat Dosaevtyń qatysýymen Máńgilik alaýǵa gúl qoıý rásimi uıymdastyryldy.
Jınalǵandar soǵysta qaza tapqan qazaqstandyq jaýyngerlerdi bir mınýt únsizdikpen eske aldy. Odan keıin qala ákimi, Uly Otan soǵysynyń ardagerleri, tyl eńbekkerleri men olardyń týystary, áskerıler, quqyq qorǵaý organdarynyń ókilderi, qoǵam qaıratkerleri jáne qala turǵyndary Dańq memorıalyna gúl shoqtaryn qoıdy.
Erbolat Dosaev maıdangerlerdi merekemen quttyqtap, shaıqas alańdarynda da, eńbek maıdanynda da kórsetken erligi úshin alǵys bildirdi.
Sondaı-aq, zor densaýlyq, baqyt pen amandyq tiledi. Ardagerler men olardyń jaqyndary qala basshylyǵyna kórsetken qurmeti úshin alǵys aıtyp, almatylyqtarǵa jáne búkil qazaqstandyqtarǵa beıbit ómir men jaqsylyq tiledi. Olar estelikterimen bólisip, óleń oqyp, áskerı ánder oryndady.
Máńgilik alaýǵa gúl shoqtaryn qoıǵannan keıin Almaty ákimi Erbolat Dosaev soǵys ardagerleri jáne olardyń týystarymen birge Otan soǵysy ardagerleri alleıasymen júrip ótti. Maıdangerlermen beıresmı áńgime barysynda Erbolat Dosaev olardyń erligine shyn júrekten alǵys aıtyp, árqaısysy el rýhynyń, Otanǵa degen adaldyq pen erliktiń tiri beınesi ekenin, búkil eldiń maqtanyshy ekenin atap ótti.
28 gvardııashy-panfılovshylar saıabaǵynda qala turǵyndary men qonaqtary úshin dala ashanasy uıymdastyrylyp, qazaqstandyq artıster soǵys kezindegi jáne soǵystan keıingi jyldaǵy ánderdi oryndaǵan merekelik kontsert ótti.
Jeńis kúni Almatyda B.Momyshuly, T.Bıgeldınov, S.Nurmaǵambetov, S.Lýganskıı, A.Sháripov eskertkishterine, sondaı-aq, «Otan uldaryna máńgilik taǵzym», «Belgisiz jaýyngerdiń molasy», «Otan úshin shaıqasta qaza tapqan batyrlarǵa máńgilik dańq» memorıaldaryna gúl shoqtaryn qoıý rásimderi de uıymdastyryldy.
Soǵys jyldary maıdanǵa 1,2 mıllıon qazaqstandyq attanǵan. Qazaqstannan 100 myńnan astam jaýynger orden-medaldarmen marapattalsa, 500-den asa adamǵa Keńes Odaǵynyń Batyry ataǵy berilgen.
Búginde Almatyda Uly Otan soǵysynyń 21 ardageri turady. Jeńistiń 80 jyldyǵy qarsańynda qalanyń barlyq 8 aýdanynda ardagerler alleıasy ashyldy. 28 gvardııashy-panfılovshylar saıabaǵynda bıiktigi 6 metr bolatyn 29 ataýly jóke aǵashy otyrǵyzyldy. Jalpy alleıalarda 200 jóke aǵashy egildi.
Búgin, Jeńistiń 80 jyldyǵyna oraı, Almatyda aýqymdy merekelik is-sharalar ótedi. 28 gvardııashy-panfılovshylar saıabaǵyndaǵy basty sahnada kontserttik baǵdarlama saǵat 21:00-ge deıin jalǵasady.
Saǵat 19:00-de Kóktóbe telemunarasynda Uly Otan soǵysynda erlik kórsetken qazaqstandyq batyrlardyń esimi jazylǵan mýltımedııalyq quttyqtaý kórsetiledi. Bul qazaq batyrlaryna degen qurmettiń belgisi.
Saǵat 21:00-de Abaı alańynda 500-den astam dron qatysatyn erekshe jaryq shoýy bolady.
Ashyq aspan astynda Jeńis ánderi 10 jáne 11 mamyr kúnderi de 28 gvardııashy-panfılovshylar saıabaǵynda shyrqalady.
Eske sala keteıik, buǵan deıin Oljas Bektenov ushqysh Talǵat Bıgeldınovtiń eskertkishine gúl shoqtaryn qoıdy.
Memlekettik keńesshi Erlan Qarın Álııa Moldaǵulovanyń eskertkishine gúl shoǵyn qoıdy.
Prezıdent Ákimshiliginiń Basshysy Aıbek Dádebaı Raqymjan Qoshqarbaev eskertkishine gúl shoǵyn qoıdy.