Almatyda jedel veterınarııalyq kómek iske qosyldy
ALMATY. KAZINFORM – Almatyda aýyr jaǵdaıda qalǵan qaraýsyz janýarlarǵa kómek kórsetý úshin eki mamandandyrylǵan brıgada quryldy.
Almatynyń Kásipkerlik jáne ınvestıtsııalar basqarmasyna qarasty qalalyq veterınarııalyq qyzmet qaraýsyz jáne qańǵybas janýarlarǵa arnalǵan jedel veterınarııalyq kómek qyzmetin iske qosty.
Jańa qyzmettiń negizgi maqsaty – shuǵyl veterınarlyq kómekti qajet etetin qıyn jaǵdaılarǵa jedel den qoıý, sondaı-aq zardap shekken janýarlardy veterınarlyq klınıkalarǵa tasymaldaý.
Janýarlarǵa alǵashqy medıtsınalyq kómek kórsetý úshin barlyq qajetti jabdyqtarmen qamtylǵan eki mamandandyrylǵan brıgada qurylǵan. Veterınarııalyq kómek qaraýsyz qalǵan jáne qańǵybas janýarlarǵa kórsetiledi.
Jedel veterınarııalyq kómekti kelesi jaǵdaılarda shaqyrýǵa bolady: jol-kólik apaty nemese qulaý saldarynan aýyr jaraqattar bolǵanda, ýlanǵan jaǵdaıda, júrek-qan tamyrlary jetkiliksizdigi, tynys alý buzylystary sııaqty ótkir aýrýlar bolǵan kezde.
Jedel veterınarııalyq kómekti shaqyrý úshin 8 708 595 64 04, 338 27 59 nómerlerine nemese Almaty qalasynyń biryńǵaı qyzmetine (109) habarlasý qajet.
Eske salaıyq, buǵan deıin Almaty ákimi qalada buralqy ıtter máselesi qalaı sheshilip jatqanyn aıtqan edi.