Almatyda Jáýtikov atyndaǵy halyqaralyq olımpıadanyń jeńimpazdary anyqtaldy
Almatyda matematıka, fızıka jáne ınformatıka boıynsha HH halyqaralyq Jáýtikov olımpıadasynyń saltanatty jabylýy ótti. Oǵan álemniń 16 elinen 700-den astam oqýshy qatysty, dep habarlaıdy Kazinform.
QR Oqý-aǵartý mınıstri Ǵanı Beısembaev olımpıada qatysýshylaryn quttyqtady.
«Búgin búkil otandyq bilim úshin aıtýly oqıǵa. 20 jyldan beri kórnekti ǵalym-matematık, akademık Orymbek Jáýtikovtyń arqasynda jyl saıyn kúlli álem tanyǵan daryndy matematıkterdiń tutas býyny qalyptasyp keledi. Halyqaralyq Jáýtikov olımpıadasy júzdegen talantty oqýshylardy jınap, bilim básekesiniń alańyna aınaldy, qazaq mádenıeti men dástúrlerin álemge tanytýǵa jol ashty. Qatysýshylardyń árqaısysy matematıka jáne fızıka sııaqty irgeli ǵylymdar boıynsha laıyqty nátıjeler kórsetti jáne búgin álemdik arenada óz eliniń týyn maqtanyshpen kóterdi», - dedi mınıstr.
Úsh pán boıynsha barlyǵy 344 qatysýshy HH Halyqaralyq Jáýtikov olımpıadasynyń júldegerleri atandy.
Bas júlde Sankt-Peterbýrg qalasynan № 239 prezıdenttik fızıka-matematıka lıtseıiniń komandasyna buıyrdy.
I oryndy Máskeý qalasynyń V.F.Ovchınnıkova atyndaǵy «Ekinshi mektep» ıelendi.
II oryndy Tbılısı qalasynan L.V. Komarov atyndaǵy № 199 matematıka jáne fızıka arnaıy mektebiniń jáne Dolgoprýdnyı qalasynan P.L.Kapıtsa atyndaǵy «Fızteh-lıtseıi» ózara bólisti.
III orynǵa Mınsk qalasyndaǵy BGÝ lıtseıi, Sofııa qalasynan kelgen Sofia High School of Mathematics, Dolgoprýdnyı qalasynan P.L.Kapıtsa atyndaǵy «Fızteh-lıtseıi» jáne Almaty qalasynan respýblıkalyq fızıka – matematıka mektebi ıelendi.
Qazaqstandyq oqýshylar 109 medal jeńip aldy: 10 altyn, 43 kúmis jáne 56 qola.
Halyqaralyq qazylar alqasynyń quramyna 7 eldiń ókilderi kirdi: Qazaqstan, Reseı, Armenııa, Belarýs, Ońtústik Koreıa, Qytaı jáne AQSh. Olımpıadanyń halyqaralyq qazylar alqasynyń tóraǵasy – Qazaqstan Prezıdenti janyndaǵy QR Ulttyq ǵylym akademııasynyń vıtse-prezıdenti, akademık Asqar Jumadildaev.
Gran-prıdi jeńip alǵan komandanyń barlyq múshelerine kýbok pen noýtbýkter tabystaldy. Barlyq júldegerler dıplomdarmen jáne baǵaly syılyqtarmen marapattaldy.
