Almatyda jasandy júrekpen ómir súrip júrgen naýqastyń tizesine ota sátti jasaldy
ALMATY. KAZINFORM — Almaty №4 qalalyq klınıkalyq aýrýhanasynyń dárigerleri 64 jastaǵy patsıentke tize býynyna tolyq revızııalyq endoprotezdeý otasyn sátti jasap shyqty. Bul týraly Densaýlyq saqtaý mınıstrligi málim etti.
Bul jaǵdaıdyń ereksheligi — naýqasqa júrek qyzmetin qoldaıtyn qurylǵy ornatylǵan, ıaǵnı ol jasandy júrekpen ómir súrip júr.
Anatolıı ıyǵyna ilgen qara shaǵyn sómkesin kórsetip, onda jasandy júrektiń batareıalary saqtalatynyn aıtty. Sómkeden shyqqan elektr symy kıiminiń astymen júrek tusyna ketedi — dál sol jerde júrek jumysyn retteıtin qurylǵy ornalasqan.
— Mine, osyndaı júıelik kontroller ornatylǵan, ol júrekten derek jınaıdy. Júrek tusynda (kórsetip) kishkentaı kompıýter tur, sol kontrollerge aqparat jiberedi. Bir keli batareıany únemi ózimmen birge alyp júremin. Úsh jyldan asty — bastysy, tirimin! , — deıdi Anatolıı Kýznetsov.
Oǵan 20 jyldan astam ýaqyt buryn júrektiń ıshemııalyq aýrýy dıagnozy qoıylǵan. Keıin ınfarkt jáne birneshe kúrdeli otadan ótti. 2022 jyly elordalyq kardıohırýrgter oǵan aortalyq qaqpaqshanyń bıologııalyq protezin jáne sol jaq qarynshany qoldaıtyn ımplant ornatyp berdi. Mundaı qurylǵymen ómir súretin adamǵa kún saıyn jaıaý júrý aýadaı qajet. Alaıda Anatolııdiń oń jaq tizesi qatty aýyratyn.
— Júregi aýyr naýqas retinde kún saıyn kemi 4 shaqyrym jaıaý júrýim kerek. Qozǵalyssyz qalsam, jaǵdaıym nasharlaı beredi. Tizeme ota jasaı alatyn dáriger izdedim. Túrli konsılıým ótti, biraq bári bas tartyp jatty. Bir jyldan astam ýaqyt tek otaǵa alatyn dárigerdi izdeýmen ótti. Sodan Almaty № 4 qalalyq aýrýhanaǵa kelip, Manarbek Ǵazızulyna jolyqtym. Ol ota jasaýǵa kelisim berdi. Reanımatologpen birge meni qarap júrgen elordalyq kardıologtarmen birlese áreket etti. Maýsymnyń 19-ynda ota jasaldy. Bul óte kúrdeli otanyń biri boldy, óıtkeni men únemi qannyń uıýyn boldyrmaıtyn dári-dármek ishemin — ol motordyń jumysy úshin qajet. Dárigerler qan ketý qaýpinen qoryqty. Biraq bári sátti ótti: kóp qan joǵaltpadym, jaǵdaıym jaqsy. Otadan beri on kúnge jýyq ýaqyt ótti — júre bastadym. Tolyq saýyǵý úshin áli de ýaqyt kerek. Uzaq ýaqyt tósekte jatqannan keıin aqyry óz betimmen qozǵala bastadym. Dárigerlerge raqmet! № 4 aýrýhananyń búkil ujymyna alǵysym sheksiz. Mundaǵy mamandar — naǵyz altyn qoldy adamdar, — dep rızashylyǵyn bildirdi Anatolıı Kýznetsov.
Naýqas № 4 qalalyq klınıkalyq aýrýhanaǵa tize býynyna buryn ornatylǵan endoprotez komponentteriniń aýyrýy men turaqsyzdyǵyna baılanysty júgingen. Aýrýhana mamandary bul joly da kúrdeli jaǵdaıdy eńserip shyqty.
— Basty qıyndyq — onyń qatar júretin aýyr patologııalary boldy: MyVal aortalyq qaqpaqsha bıoprotezi, sozylmaly júrek jetkiliksizdigi, arterııalyq gıpertenzııa, baýyr men búırek qyzmetiniń buzylystary jáne basqa da birqatar kúrdeli aýrýlar. Ota aldynda tolyq klınıkalyq jáne zerthanalyq tekserý, mýltıdıstsıplınarlyq daıyndyq júrgizildi. Nátıjesinde ota sátti ótti. Erte ońaltý kezeńinde patsıent táýlik boıy ARQTB-de baqylaýda boldy. Kelesi kúni-aq belsendi ońaltý bastaldy. Búgin ol aýrýhanadan úıge shyqty, jaǵdaıy jaqsy, kún saıyn ózin jaqsy sezine bastaǵanyn aıtady, — deıdi Almaty № 4 qalalyq klınıkalyq aýrýhanasy endoprotezdeý bólimshesiniń meńgerýshisi Manarbek Aýbakırov.
Hırýrgııalyq otany travmatologııa-ortopedııa bólimshesiniń meńgerýshisi, joǵary sanatty ortoped-dáriger M.Aýbakırov jasasa, anestezıologııalyq súıemeldeýdi ARQTB meńgerýshisi, joǵary sanatty dáriger J. Dáýletbekov qamtamasyz etti. Emdeýshi dáriger retinde ortoped-travmatolog J.Orozhan boldy. Bul jaǵdaı — asa joǵary hırýrgııalyq qaýipke qaramastan almatylyq mamandar komandasynyń úılesimdi jumysynyń aıqyn úlgisi.
— Jasandy júrekpen ómir súrý — múlde bólek jaǵdaı. Kúıeýim sýǵa túse almaıdy, jýynýy — tek dymqyl shúberekpen súrtiný. Qurylǵynyń shlangi bar, kún saıyn tańǵysh aýystyramyz. Kúndiz ıyǵynan sómke túspeıdi, túnde — statsıonarlyq qurylǵyǵa jalǵanady. Bir jarym jyl boıy tize aýrýynan qatty qınaldy. Baldaqpen áreń júretin. Jata bergen soń kóz aldymda qartaıa bastady. Biz barmaǵan jer qalmady — bári qorqyp, bas tartty. Bar bolǵany 1% múmkindik berdi. Biraq biz táýekelge bel býdyq. Dárigerlerge: «Biz sizderge senemiz!» — dedik. Óz basym olarǵa 100% senimdi boldym. Joldasym aman qalatynyn bildim, — deıdi naýqastyń jubaıy Olga Kýznetsova.
Aıta keteıik, buǵan deıin Almatyda 43 jastaǵy er adamǵa júrek transplantatsııasy jasalǵan bolatyn.