Almatyda mereke kúnderi qansha qylmys tirkeldi
ALMATY. KAZINFORM – Almatyda jańajyldyq mereke kúnderi tynysh ótip, oqys oqıǵa bolǵan joq. Bul týraly Almaty polıtsııa departamenti qoǵamdyq qaýipsizdik basqarmasy bastyǵynyń orynbasary Aıtan Eleýsizov aıtty.
Onyń málimetinshe, qalada 15 jeltoqsannan bastap jeke quram kúsheıtilgen. Adam kóp jınalatyn oryndarǵa – alańdarǵa, saıabaqtarǵa, jańajyldyq jáne mádenı-buqaralyq is-shara ótetin jerlerge tártip saqshylary kóp nazar aýdardy.
Qalanyń negizgi alańdarynda ornatylǵan barlyq jańajyldyq shyrsha men olarǵa irgeles aýmaq polıtsııanyń turaqty baqylaýynda boldy. Mereke kúnderi jaıaý jáne avtosaqshylar jaǵy kúsheıtilip, saqshylardyń qosymsha kúshteri, ýchaskelik ınspektorlar men mamandandyrylǵan bólimshelerdiń ekıpajdary tynbaı jumys istedi.
1-4 qańtar aralyǵynda Almatyda 45 qylmys tirkeldi. Olardyń 32-si patrýldik polıtsııa men ýchaskelik ınspektorlardyń kúshimen «izi sýymaı» jatyp ashyldy. Sonymen qatar qoǵamda dúrbeleń týdyrýy múmkin asa aýyr qylmystar men quqyq buzýshylyqtarǵa jol berilgen joq.
Buzaqylyq, sondaı-aq turmystyq jáne otbasylyq-turmystyq janjal sııaqty negizinen mereke kúnderi jıilep ketetin quqyq buzýshylyq kóp tirkelgen. Barlyq habarlamaǵa polıtsııa der kezinde nazar aýdarǵan.
– Buzaqylyq, sondaı-aq turmystyq jáne otbasylyq-turmystyq janjal sııaqty negizinen mereke kúnderi jıilep ketetin quqyq buzýshylyq kóp tirkelgen. Barlyq habarlamaǵa polıtsııa der kezinde nazar aýdardy. Osy kúnderi qylmystyń aldyn alýǵa kóp kóńil bólindi. Polıtsııanyń kósheni, turǵylyqty jerler men qoǵamdyq keńistikterdi barlap júrgeni qaýipsizdik pen tártipti saqtaýǵa yqpal etti, - deıdi Aıtan Eleýsizov.
Eske salaıyq, buǵan deıin Almatyda Jańa jyl qarsańynda polıtsııa jasaqtarynyń sany artqanyn jazǵanbyz.