Almatyda jańadan alynatyn avtobýstarda júrgizýshi kabınasy bolady
ALMATY. KAZINFORM - Almatyda jolaýshylarǵa qyzmet kórsetetin tasymaldaýshy kompanııalar júrgizýshige arnalǵan kabınasy bar avtobýstardy alýy qajet. Bul týraly Almaty qalasy Qalalyq mobıldilik basqarmasy habarlady.
Ótken jyly jeltoqsan aıynda jolaýshy №47 avtobýstyń júrgizýshisin uryp, basqarýsyz qalǵan qoǵamdyq kólik aıaldamadaǵy adamdardy basyp ketken bolatyn. Oqıǵa saldarynan 3 adam qaıtys boldy. Osy jaǵdaıǵa silteme jasaı otyryp, avtobýstarǵa qatysty qandaı talaptar ózgergenin Almaty qalasy Qalalyq mobıldilik basqarmasynan suradyq. Basqarma Almaty qalasy polıtsııa departamentinen qalada qyzmet kórsetetin avtopark jumysyna monıtorıng pen taldaý júrgizý týraly usynys kelgenin habarlady.
- Atalǵan usynysqa sáıkes, Basqarma júrgizýshiler men jolaýshylardyń ómiri men densaýlyǵynyń qaýipsizdigin qamtamasyz etý úshin avtobýs salondarynda júrgizýshi men jolaýshy arasyndaǵy fızıkalyq baılanysty boldyrmaıtyn júrgizýshilerge arnalǵan kabınalar jańa avtobýstardy satyp alǵanda mindetti bolýy qajettiligi týraly Almaty qalasynda jolaýshylardy tasymaldaý qyzmetin kórsetetin tasymaldaýshylarǵa tıisti hat joldandy, - dep habarlaıdy basqarmadan.
Eske salaıyq, buǵan deıin 3 adamnyń ólimine ákelgen avtobýs apatyna baılanysty kúdikti dep tanylǵan Darhan Ahmetjanovqa qatysty sot otyrysy bıyl 20 naýryzda bastalǵanyn jazǵanbyz.
25 sáýir kúni prokýror sottan D.Ahmetjanovty kináli dep tanyp, ony segiz jylǵa bas bostandyǵynan aıyrýdy suraǵan edi.
Buǵan deıin sottalýshy Ahmetjanov 293-baptyń 1-bóligi («Buzaqylyq») boıynsha ǵana kinásin moıyndap, adamdardyń ólimine júrgizýshini kinálaǵan bolatyn.
26 sáýir kúni sot úkimi shyǵyp, Darhan Ahmetjanov 8 jylǵa sottaldy.
